admin
YiNtatheli kaMthunywa
UMKHOKHELI weZimbabwe Football Association uPhilip Chiyangwa usebike ukuba kudingeka ukuthi abantu bahlanganise amakhanda endaweni yokuthi basole konke okwenzakala kunguqu yakuleli.
UChiyangwa owaziwa ngokungatshayi inja efihla umphini, uthe labo abangela mali abavale umlomo, bengaqineli ukuchothoza njalonje. UMkhokheli lo uthe usekelo lwemali lubalulekile ekuqhutshweni kwenhlelo zamathimu elizwe.
Ukhulume lokhu ngesikhathi esemsakazweni weStar FM kuliviki lapho abechaza ngamalungiselelo eqembu lesizwe kumqhudelwano weAfrican Cup of Nations ezweni leGabon ngo2017.
“Ngemva komdlalo wethu leGuinea, banengi abesithi asizange silungiselele kakuhle umdlalo lo. Kwakhulunywa izinto ezinengi. Abangakwazi ukuthi nxa ungasekeli ibhola ngemali kumbe ukuncedisa ngezinye indlela ukuze ibhola lethu likhule, kungangcono bavale umlomo,” kutsho uChiyangwa emsakazweni.
Iqula lenkokheli zeZifa zachothozwa ngokwehluleka ukulungiselela kuhle inkamba yamaWarriors phambili komdlalo wokucina womkhankaso weAfcon.
AmaWarriors afika anqotshwa 1-0 eGuinea.
“Siphezulu kokuhlanganisa amakhanda silungiselela imidlalo yeAfcon ka2017. Sizenza okungcono ukuthi amaWarriors alolonge kulesikhathi,” kutsho uChiyangwa.
Online Reporter