Sephenduke uBiya uMudhuwa. . . ubabonis’ intuthu abagadli begedi

Ncekwenhle Ncube
ABALANDELI beqembu laMahlolanyama sebekhethe ukuthi babize imvimbi enguPeter Muduhwa ngelithi Biya kulandela ukuvala kuze kuqaphe ibhetshu kusukela ekuqaleni kwenkezo yeCatsle Lager kuze kufike kumdlalo wabo leDynamos lapho abayitshaye kwaba yizililo kuphela ngeSonto edluleyo.

Kubo bonke abadlali abazimvimbi emaqenjini adlala kuPSL uPeter Muduhwa setshengise abalandeli bakanobhutshuzwayo kanye labanye abadlali ukuthi yena uyinsimbi edlezinye izinsimbi nanko phela sekusiya phela inkezo kungela ngitsho lomgadli wegedi odlulayo.

Intatheli ixoxisane labalandeli beqembu elikhulu elaMahlolanyama ngemva komdlalo weHighlanders le Dynamos  bona abaveze ukuthi imvimbi enguPeter isiphenduke uBiya wangempela.

“Umfana lo usenzela kuhle kakhulu. Nxa ekhona emuva asethuki ngoba yimvimbi enganyikinyekiyo.”

“Uze angikhumbuze uBiya owayethanyela konke okusemsamo kungasali lutho. Lokhu ukwenze lamuhla lapho avimbe khona abafana beDeMbare baze baginqa amazwane,” kutsho uNkosana Dlodlo.

Omunye umlandeli weqembu othande ukwaziwa ngokuthi nguMakhosi utshele intatheli ukuthi akulamvimbi engaqathaniswa loPeter kweleZimbabwe.

“Nxa singaqathanisa umfana uPeter labanye abadlali kakho ongafana laye. Indlela adlala ngayo kuyakhanya sobala ukuthi yimvimbi uqobo. Usephenduke uBiya eqenjini leBosso,” kuchaza uMakhosi.

Ngaphandle kokuba yimvimbi uPeter usetshengise ukuthi angaba ngumdlali obukhali kakhulu enkabeni ongadabula  umambule kudume inkundla yonke.

NgeSonto umdlali lo usuke lebhola emuva waquma phakathi kwabadlali beDeMbare ebakhethuza wanika uMatema otshiye unozinti weDeMbare engusimangele.

Abalandeli bakaMantengwane bathe inkokheli kumele zibambe ziqine ngoba akusensukuzatshwala ukuthi amazwe angaphandle babemuke imvimbi yabo.

Omunye njalo umlandeli weqembu leli othande ukwaziwa ngokuthi nguGolide uthe ubona ikusasa likaMuduhwa ligabhela kancane elikaBiya ikakhulu nxa engathathekanga ngezidakamizwa.

“Ujahana lo ngibona ezabaphambili nxa amaluba omhlaba engamkhanganga ngoba vele ungene ekhanya evuthiwe ikanti ke oBiya bona bangena beluhlaza nanko phela esadlala eLuveve abalandeli basola ukudlala kwakhe kanti ababuzanga elangeni.”