Online Reporter
Lovemore Dube
UCHABUKA Mwale owake watshibilikela iqembu leHwange FC kanye leZPC (Hwange) enzikini yenkudla ubekwe ngoLwesithathu eHwange.
UMwale obeleminyaka engu-56 udlule emhlabeni ngemva kokungena kungozi yemota eTshabalala Sanctuary emgwaqweni osuka koBulawayo usiya eKezi.
Kubikwa uMwale nguye yedwa owedlula kungozi le, lapho ayehamba lomkakhe kunye labantwana abathathu bonke abaphephayo.
UMwale owakhulela eZambia wasesiza eZimbabwe ilizwe lisanda kuthola uzibuse, ufunde eSir Humphrey Gibbs eHwange. Kumfundo yaphezulu waya esikolo seTennyson Hlabangana Secondary School. Uthe efika kuFomu 3 wayesedlalela iqembu leGiant Killers elalidume kakhulu eHwange livela eMadumabisa.
Eqeda uFomu 4 wathathwa liqembu leZesa (Hwange) elo Anthony Nakamba owabambela iHwange kumnyaka wokuqala kuZifa Southern Region ngo1989.
Umdlali lo wadlala labanye abadlali beHwange abagoqela uIsaac Tshuma, London Khumalo, Mindo Nyoni labo Shelembe abadlalela iHwange leqembu leZesa (Hwange).
UMwale utshiye unkosikazi, uSibongile Dube.
Umngane wakhe uAnthony Nakamba uthe bahambe bonke isikhathi eside.
“Ukuzwa ngokwedlula emhlabeni kukaMwale kungitshaye kakhulu. Sisuka khatshana sonke. Besingabangane kusukela siseHwange langesikhathi sesisonke futhi khonapha koBulawayo.
UPhillip Jambaya ababehlala elokitshini linye uthe uMwale ubehlala ebakhuthaza.
“Ubehlezi esikhuthaza ukuthi sidlale sisebenze gadalala siziphathe kuhle njalo,” kutsho uJambaya ngoLwesibili koBulawayo.
