Online Reporter
Nkosilathi Sibanda
EKUNQOTSHWENI kwayo kumdlalo wenkezo yeChibuku, iqembu leSimba Bhora lizaqinela ukulolongela umqhudelwano weConfederation of African Football Champions League (Caf).
Umqeqetshi weqembu uJoel Luphahla uthe bakhangelele okukhulu kulumncintiswano odibanisa intshantshu i-Africa yonke.
Kunkezo yeChibuku uLuphahla labafana bakhe banqotshwa 5-3 ngembekwa yiDynamos.
“Sehlulekile kuChibuku, sesiphumile. Kumele sigxile khathesi kumkhankaso weChampions League kunye leligi. Injongo yethu yikuthi siqhubeke sigcine indawo yethu kakuhle kuligi. Kodwa, akusoze kube lula ngoba amanye amaqembu ayasidudula,” kutsho uLuphahla.
ISimba Bhora izaqala umkhankaso wayo kuCaf Champions League ileqembu leSwatini, iNsingizi Hotspurs.
Umdlalo ozadibanisa zombili uzabe umhlaka 19, kuthi ngeviki elilandelayo, zidibane kowesibili.
ULuphahla uthe okwakhathesi usaqina ngokuqinisa abadlali bakhe, ethembele kubo ukuthi badlale kuhle, nanko iqembu lichinsa ukutshibilika enkundleni zakwamanye amazwe.
“Kulomsebenzi omkhulu esibhekane lawo phambili. Njengomqeqetshi, owami umsebenzi ngowokuthi ngibe lamaqhinga lamacebo okuqinisa iqembu. Singena umncintiswano weCaf sisazi ukuthi sikhangelelwa phansi ngoba siqala kuwo.”
Kusenjalo, kulimpelaviki iSimba Bhora idlala leMWOS enkundleni yeNgoni kumdlalo weCastle Lager Premier Soccer League ngoMgqibelo.
IChicken Inn inxuse iManica Diamonds eLuveve, kuthi ngelanga elilandelayo iHighlanders izabe ileTelOne Emagumeni.
Imidlalo ngokugcweleyo:
NgoMgqibelo: Chicken Inn v Manica Diamonds (Luveve); GreenFuel v Herentals (Greenfuel Arena); MWOS v Simba Bhora (Ngoni Stadium); Ngezi Platinum v Bikita Minerals (Baobab)
NgeSonto: CAPS United v Yadah (Rufaro); Highlanders v TelOne (Barbourfields); Kwekwe United v Dynamos (Bata), Triangle v FC Platinum (Gibbo)
