Pheka loMaMoyo: Amacimbi

Zinengi izitshebo esiziphiwa nguNkulunkulu ngomdabuko esibona nje sezikhona ngezikhathi ezehlukeneyo phakathi komnyaka.

Amacimbi la engizakhuluma ngawo lamuhla yizibungwana nje ezifana nje lesinye esingadliwayo okuthiwa ngumahaqaza. Amacimbi akhona kundawo ezehlukeneyo lapha eZimbabwe kodwa kakhulukazi eMaphaneni ngapha esiNdebeleni. Akhula kuzo zona izihlahla zamaphane ngesikhathi sezulu, ayizibungwana ezihamba zifuquzela ezigolwa ngabantu.

Abanye bayawesaba amacimbi lokuwadla ngeke bawadle kodwa abawadlayo bathi amnandi inkani kuthi njalo abanye bawadla becimezile besesaba ukuwabona kodwa amacimbi amnandi bantu njalo azuzakala lula.

Ukugolwa kwamacimbi
Agolwa khona kanye ezihlahleni zamaphane lemdlawuzweni. Ubona abantu abavela kundawo ngendawo besiyagola amacimbi bethwele amasaka okugolela.

Uyawafica esidla amahlamvu esihlahla,  ukugolwa kwawo yikuthi ubambe linye ngalinye ukhame umswane ophakathi kwalo uze ugcwalise loba yini ogolela kuyo, kungaba yinkonxa kumbe isaka. Ungafika ekhaya usuzawapheka ngebhodo uwathi futhuthu ubusuchitha amanzi uwapheke okwemizuzu engu-20 uwafake isawudo.

Wakhuphe lapha ebhodweni ubusuwachaya ome qha. Khathesi usungaya wathengisa emakethe kumbe uwabekele uzitshebele nje.

Isitshebo samacimbi

Okudingalayo
– Isihlukuluzwana samacimbi aphekwe onyiswa alingana imuli yakho.
– Ipane kumbe umphika.
– Amanzi amalutshwana.
– Amafutha okupheka, ibilebile loba i-curry kumbe imithikazana ethize lesawudo.
– Ihanyanisi eyodwa letamatisi ngokuthnda kwakho.
– Uphini lokuphendula.

Ukupheka
– Qala ngokugeza izandla zihlambuluke.
– Hluba ihanyanisi uyisike izincezwana, hluba njalo itamatisi ulisike libe zincezwana lalo.
– Thela amafutha embizeni ubusufaka ihanyanisi uyikhanzinge ize ibebomvana ubusuyikhupha uyibeke laphaya.
– Thela embizeni amanzi amalutshwana sibili okuthi futhuthu ubusufaka amacimbi.
– Thela imuthikazana oyithandayo ukhanzinge.
– Thela ihanyanisi lamatamatisi akhanzingiweyo phezu kwamacimbi ngokuthanda.
– Nanzelela kuyenzeka ukuthi ungahlanganisi amatamatisi lehanyanisi ndawonye lamacimbi kodwa kudliwe kodwa.
– Womise ngoba ubumnandi bamacimbi yikuthi qha-qha nxa ulidla hatshi ukuthi hlifi-hlifi.

Ukudliwa
Pheka isitshwala ubususidla ulumela ngamacimbi. Asibunandi yisimanga. Ungancitsha esingaboniyo njalo usutha uthi nti, phela ayaminzisa amacimbi.