admin
IMIKHUBA yamaNdebele ngokudla kwawo minengi impela. Omunye wathi babesidla bodwa okumnandi bencitsha omama labantwana. Ulimi lwenkomo lwalungaphongukudliwa ngubani lobani.
Ha! Kwaze kwakuhle bantu lamuhla sonke sesizitika kuyiphi layiphi inyama. Kuhle-ke ukuba wazi ukuthi iphekwa njani. Singalo ulimi lwenkomo oluphuma kunhloko yenkomo.
Okudingakalayo
Ulimi lwenkomo oluthengileyo kumbe kuhlatshiwe lapha ekhaya
– Umphika kumbe ibhodo yokuphekela
– Isawudo, i-pepper lengqamu
– Amanzi aqandayo
– Umlilo kumbe isitofu
– Umganu wokuphakela
Ukupheka
— Bona ukuthi lutsha nxa uluthengile.
— Bona njalo ukuthi luxhonxaxhonxiwe izikhala ezincinyane.
— Gezisa ulimi ngamanzi aqandayo luze luhlambuluke.
— Faka ulimi lunjalo embizeni opheka ngayo.
— Thela amanzi aqandayo amanengi.
— Yekela kubile kuxhwathe okwesikhathi eside okungaba ngamahola amabili (2 hours).
— Nxa kuxhwatha amagwebu eza phezulu kwamanzi. Wena-ke wengule amagwebu uwalahle.
— Bona ukuthi luvuthiwe ngokuluhlabahlaba. Lona luzaba buthakathaka luhlabeke.
— Lwephule eziko uluyekele lupholaphole lusemganwini.
— Khathesi thatha ingqamu uhlube isigogo solimi lamathanjana amalutshwana ekucineni.
Ukudliwa
Abanye baludla lusatshisa balusike amagatshana balumelise isitshwala. Kuthi abanye bafake phakathi laphakathi kwesinkwa amaqatha banathise itiye yabo.
Babekhona abazidlela nje lunjalo lona ngokwalo.
Lumnandi phela ulimi, yikho nje sasincitshwa thina omama labantwana.
Ulimi oludliwa seluqanda
Hawu ngaze ngaginya amathe ngoba phela lumnandi okumangalisayo ulimi oludliwa luqanda.
Nanzelela lokhu ngemuva kokususa isigogo kulimi oluvuthiweyo.
— Lugoqe ulimi ulufake egabheni lekhekhe uvale ngomganu ongafiyo phezulu.
— Faka phezu komganu insimbi enzima.
— Luyekele kusimo lesi luze luphole nxa ulefriji ungalufaka khona ukuthi luphole.
— Lukhuphe uluqumaqume izincezwana ezilulana.
— Ludle njengakuqala ulukholise.
Nanzelela
Lungadliwa njalo lemibhida eluhlaza enjenge lethisi, amatamatisi kumbe ikhabitshi lamagwili aphekwe ayekelwa aqanda.
Lokhu-ke konke kubizwa ngokuthiwa ngamasaladi (salads).
Bantu bakithi lumnandi ulimi okumangalisayo ikakhulu lolu oluqandayo. Pheka ukholise lawe ukhululekile ukudla inkani yini lani oyithandayo.
Online Reporter