admin
Ngilokhu ngikhuluma ngokupheka isitshebo semihluzi njengoba lamhlanje inyama ingasabonwa. Kulula ukuthi siziphekele imihluzi sitshebe ngayo, loba sithenge le esemaphakethini, eyempuphu sizilungisele isitshebo.
Yimihlobohlobo yemihluzi, okuqakathekileyo yikuthi wazi ukuyipheka kuhle uyinonise ngonganonisa ngakho.
Okudingakalayo
-Ihanyanisi ezingu 4 kusiya ngokuthi ufuna umhluzi onganani.
-Amagwili amakhulu angu 4.
-Amatamatisi angu 3 .
-Amafutha okupheka ngenkezo zokudla ezingu-6.
-Isawudo, ifulawa, ibilebile, i-pepper, i-curry leminye imithikazana.
-Uchago lamanzi.
-Imbiza yokuphekela (saucepan) lophini.
-Ukhezo olulodwa lwe-Rich Oxtail Soup.
-Itshukela ngenkezo embili zetiye.
Ukupheka
-Qala ngokugezisa amagwili aphele inhlabathi yonke.
-Gezisa amatamatisi.
-Khathesi hluba amagwili uwaphosele emanzini aqandayo.
-Qoba amagwili iziqana ezilingeneyo uziyekele khonapho emanzini uzazisebenzisa nxa usuzifuna.
-Qoba ihanyanisi iziqana ezilingeneyo.
-Thela amafutha emphikeni uwayekele atshise ubusukhanzinga ihanyanisi oyiqobileyo.
-Thela amanzi abilayo phezu kwamatamatisi.
-Hlala imizuzwana emithathu ubusuhluba izigogo zamatamatisi.
-Qoba amatamatisi incezu ezinciyane.
-Faka amatamatisi phezulu kwehanyanisi uphenduphendule.
-Khathesi thela amagwili phezulu uthele lamanzi ngenkomitsho ezintathu.
-Yekela lokhu kuxhwathe okwemizuzu elitshumi.
-Faka isawudo leminye imithikazana.
-Faka njalo ukhezo olulodwa lwe-Rich Oxtail lenkezo ezintathu zetiye zetshukela.
-Thatha amanzi ngengxenye yenkomitsho uthele ukhezo lokudla lwefulawa uhlanganise.
-Thela lokhu phezu kwamagwili uhlanganise.
-Yekela kuxhwathe emlilweni omncinyane okwemizuzu emihlanu.
-Phenduphendula ubone ukuthi akutsheli.
-Khumbula ukupheka lokhu emlilweni omncinyane. Yandisa amafutha ngokuthanda kwakho kodwa ukhumbule ukuthi amafutha amanengi abangela umkhuhlane.
Nanzelela ukuthi nansi eminye imibhida engathatha indawo yamagwili:
-imiqwente (carrots) kumbe turnipd
-indumba eziluhlaza ezimanzi kube ezomileyo.
-Amathanga
-I-butternut
-Itshomoliya
-Ikhabitshi.
Khathesi usuqedile ukupheka umhluzi wokutsheba, ukuba mnengi okunganani kuzakuya ngokuthanda kwakho.
Qaphela lokhu umhluzi lo ungawubeka endaweni eqandayo ukuze uwusebenzise kumalanga azayo.
Uwudlisa lani umhluzi lo?
Umhluzi lo ungadliwa lesitshwala sempuphu yamabele, yomumbu kumbe eyengqoloyi. Ungadliwa njalo ngamatshaka, irayisi kumbe amagwili abondiweyo.
Dlana ukholise, ungakhali ngezitshebo yona imihluzi yokuziphekela ikhona. Khumbula njalo ukuthi oseleyo umhluzi uyagcina endaweni eqandayo uze utshebise kwamanye amalanga.
Online Reporter