admin
MINENGI imizi othola isingamawoba, ufumanisane lezibi zisuka esangweni zisiya emsamo. Abantu abahlala lapho uthole kulikhehla lesalukazi bonke sebempunga, mhlawumbe nxa bethe baba lenhlanhla bahlale lomzukulu.
Abanye uthola bengabazali babantu abahlonitshwayo esigabeni abafana labo somabhizimusi kumbe omaqhuzu bamankampani, kodwa abazali babo bephila luklubhu besidla imbuya ngothi. Behlupheka bephila ngoncedo oluvela kuHulumende sokungani ngabantu abangazalanga. Uzwe abantu sebesithi laba abazalanga babola amathumbu.
Isimanga yikuthi abazali bakhulisa abantwana nzima besadalala, kwesinye isikhathi belala bengadlanga besenzela ukondla imuli. Khathesi ungakhangelisisa abantwana basuka bayezihlalela emadolobheni bakhohlwe ngokwekhaya, lokuthumela ukudla kube yigqo.
Banengi abantwana abathi emveni kokukhula kwabazali bangasabi lesikhathi labo, bahawule abantu beNkosi, abanye ngabathathwa besiwe endaweni okugcinwa khona asebegugile, sebesenyanywa ngoba sebegugile, ngenxa yokuthi bayabe bengasela mandla bavuma yonke into.
Lokuthi bagezile kuyabe kungasindaba yamuntu, uthole benyozile ngengcekeza sekungani luxakuxaku oluhaqazwe lilanga likaMpandula. Bakhohlwe lomyalezo wencwadini engcwele othi, “Hlonipha uyihlo lonyoko ukuze insuku zakho zande ezweni.”
Kambe ziyavela ngaphi izibusiso zakho nxa wena ukholwa abayibo abakuletha kulo umhlaba? Kumbe subona angathi wakhithika esihlahleni njengehlamvu.
Lapho esikhona kasikhumbuleni abazali bethu zikhathi zonke. Kuhle yini ukubukwa ngabantu kodwa wena usehluleka ukugcina umzali wakho? Angithi ungamthatha umzali wakho uhlale laye uzakwenza izibusiso zakho lawe zengezelelwe.
Ayixabene.
Umlobi ungamthinta ku: 0714355641
Online Reporter