admin
WAWUTHI usizwa kuthiwa usibani banyana ngumfundisi vele wazi ukuthi ngumuntu weNkosi, wembethe ijazi lothando, inhlonipho, isizotha loncedo alunikeza abantu kungela mbadalo.
Sesiphila ensukwini ezinzima okungasathenjwa muntu ungezwa kuthiwa ngumzalwane kanti ingaphakathi yakhe yinkalakatha kaguluva, njalo amanye amabandla adala imikhokha engeke wayizwisisa.
Ngithemba lawe uyake ukuzwe emsakazweni lakumaphephandaba ukuthi akhona amabandla adlisa abantu uqethu lona oluhudisa izimvu ufice sengathi zidle ububende.
Amanye nganathisa abazalwane iphethulo, kambe ungakunakana ukuthi iphethulo ifike yenzeni emathunjini omuntu.
Ngikhumbula enye engake ngabala ngayo batshabalala abazalwane kuthiwe banathe umuthi wamagundwane.
Kwamanye amabandla akhona nxa ungela mali yomnikelo uvele uphendukiswe emnyango, kwesinye isikhathi kuqanjwa lokuthi kukhitshwa malini nxa ungelayo uzahamba uyeboleka, ngoba umninisonto eyivulela amehlo abomvu.
Sezitshiyene isonto esakhula sizingena lezinengi zakulezinsuku, mhlawumbe kubangelwa yikuthi noma ngubani usephongumane avule ibandla lakhe, engayanga lokuyakwenza izifundo zeThiyoloji, afunde kabanzi azwisisise okufunwa yincwadi engcwele.
Ayixabene.
Umlobi uthinteka ku 0714355641.
Online Reporter