LEZINSUKU umuntu angabamncane ekuzalweni, kumbe kungabe kusemfeni kumbe emtshadweni kumbe sibi sokulobola kukhangelwa ukuthi umuntu ulemalini njalo uhamba ngemota enjani nxa uhamba ngohlobo lwemota lezi ezibelethe amasondo uhle uthathwe njengomuntu omkhulu.
Ubonakala njengomuntu olemali olento zakhe okhomba ngophakathi. Uhlonitshwa lalikhehla eselimpunga eselingumakade ebona. Abanye uzwa sebebiza okungumfanyana kwayizolo sokuthiwa ‘Mdala’ ngoba elemali.
Banengi abadala abalenqwabanqwaba zemali ezithi nxa ungathi uyakunanzelela ngeke ubekwazi ukuthi bazicupha ngaphi nanko phela ngeke uzwe kukhulunywa ngembali yakhe ukuthi uke wasebenza kunkampani thize ngovuka ngikhona njengamazolo.
Ngikhumbula omunye ujaha kamakhelwane wami wathi efika evela edolobheni wabuya ethwele inkalakatha zemali kwasukuma amakhehla bemqhubela isitulo amakhehla akhetha ukuhlala phezu kwamatshe lezitina ngoba bethi likhiwa linikezwa zonke izicoco zenhlonipho.
Izolo bekuthi noma usebenza msebenzi bani okuholwa khona ngengowani umuntu omdala ubehlala emdala noma elembuzi ezintathu. Khathesi ungakhangela izihlobo nxa zinxusa abantu emtshadweni kuqala ngezihlobo ezilemali ukwenzela ukuthi zikhunge.
Kudala kwakuthi noma isihlobo singumyanga sasikhunga ngenkukhu kumbe ngokhomane lezinsuku nxa ungela nhlamvu zesiliva eziyizo uJudas Iscariot athengisa ngazo indodana kaMariya enguJesu uMsindisi wethu awubalwa njengomuntu.
Lalapho ungukhwenyana nxa ungelamali, nxa uvakatshele kwenuzala abakuhlabeli ntondolo ngoba uze izikhwama zibhobokile zibetha umoya. Labanye omama abendileyo abasahloniphi omkabo ngoba bethi abalamali, lalapho indoda isithi iyakhwaza ifuna kukhale esayo isicathulo egumeni layo bayiphendula ngelokuthi amanye amadoda adinga imali, hatshi ukutshona umuntu ekhwaza okwezulu elina ngesiqhotho.
Ayixabene.
