Online Reporter
KOMUNYE umnyaka emuva le, ngangisebenza lelinye ixhegu engasengilibiza ngokuthi ngumalume ngoba elesibongo esifana lesentombi eyaletha mina emhlabeni. Lalo ngokufanayo lalingibiza mzukulu.
Ubuhlobo bethu lobu baqina okwamagama, ongaziyo wayengafunga agomele ukuba singabantu banye njalo sivela ndawonye loba yena wayevela empumalanga.
Kwathi ngelinye ilanga wehlelwa yingozi ehamba ngemota yemsebenzini, ngokusweleka kwenhlanhla wahle wedlula emhlabeni. Lathi lifika ilizwi emsebenzini, kwacatshangwa mina ukuthi ngizatshelwa ngubani njalo njani njengoba ngingumzukulu wakhe.
Ngathunyelwa umaqhuzu wenkampanini ukuthi azongibikela, kulapho ezinye izisebenzi ezamangala khona sengichaza ukuba kasisi zihlobo zegazi.
Ngamchazela ukuthi ubuhlobo bethu babudalwe yikufana kwezibongo. Kodwa sabuye sethuka sekufike izihlobo zegazi ‘‘zikamalumami lo’’, sesisizwa ukuba ibizo lesibongo esasimbiza ngakho kwakungayisikho, ngoba sathi sifika emotsha kwathiwa ofele engozini yemota nguZibanibanyana sonke esasisebenza laye sathithibala sabamba owangaphansi.
Ukumangala kwethu njengezisebenzi kwaze kwananzelelwa ngomunye umzukulu wakhe uqobo owahle wasichazela ukuthi lelibizo ngelakhe, kodwa ayisilo elisesithupheni. Wakhuluma kabanzi esitshela ngomalumakhe okunengi esasingakwazi.
Kukanengi ukuthi umuntu angabizwa kogoqwanyawo sifunde kumbe sazi okunengi ngaye ngoba kuvamile ukuthi ngelanga lomngcwabo izihlobo labangane zikhulume zifakaza ngomufi.
Ayixabene.
