UMTHUNYWA

COMMENT: Ukwenza imisebenzi yangekhaya kubalulekile kubafundi

NGAPHANDLE kokubala ingwalo, abantwana besikolo kumele bakhuthazwe ukwenza eminye imisebenzi. Okumqoka yikwenelisa ukusebenzisa isikhathi ngendlela efaneleyo.

Abantwana bathola ukujulisisa ingqondo lokuba lamacebo okuthuthukisa impilo zabo nxa besenza imisebenzi etshiyeneyo. Ngokuhlanganisa imisebenzi eminengi, abafundi bengakwazi ukubeka phambili izinto eziqakathekileyo empilweni, ukwehlukanisa, lokulandelela umsebenzi wabo uze uphutshe.

Bathola ulwazi lokuxazulula inkinga, ukucabangisisa ngokujulileyo lokwenza izinqumo ezicacileyo. Umntwana uyenelisa ukuphila kuhle lalapho nxa kuthe kwatshintsha isimo empilweni. Konke lokhu kubalulekile kumpilakahle yengqondo.

Ngokuphatha imisebenzi eminengi, engaphandle kweyekilasini, abafundi bayehlisa ukukhathala kwengqondo lokwethuka. Bakhululeke.

Ababalisi kumele bakhuthaze ukuthi abafundi benze imisebenzi etshiyeneyo kumbe amaphurojekithi ngesikhathi esisodwa. Ngokwenza njalo, abafundi bayenelisa ukusebenzisa isikhathi lokwazi ukusebenza ndawonye.

Abantwana kumele bavunyelwe ukukhetha phakathi kwemisebenzi ethile ebakhuthaza ukwenza izinqumo lokuzimela.

Imisebenzi efana lokubhala, ukudweba, lokusebenzisa izandla ibalulekile ukuze abafundi baphumelele ezifundweni. Ezemidlalo, ezibalisela ukugijima, ukweqa lebhola lakho kuyadingeka.

Umfundi uthola ukuzethemba nxa eqede umsebenzi awuphiweyo phambili kwakhe.

Kulemisebenzi engaphandle kwezifundo enikeza inzuzo ekuxhumaneni labangane lokukhuthazana empilweni njengabafundi.

Abafundi bathola ithuba lokufunda okutsha lokunanzelela amathalenta abo abakade bengawazi. Baphiwa njalo ithuba lokusebenza ndawonye, ukwakha ubudlelwano labanye okubancedisayo empilweni yabo yakusasa sebephume esikolo.

Ukwenza imisebenzi labanye kuyafundisa ngokwazi amasiko abanye, kwengeze lokuzwisisana. Phezulu kwakho konke, kuletha ukuzethemba lokwakha isimilo esihle.

Kodwa, siqaphele ukuthi ukusebenza kakhulu kuyakhathalisa umzimba lengqondo.