admin
Buhlebenkosi Gaule
IBHIZIMUSI yokufuya ingalukhuni ngenye yamabhizimusi alabantu abalutshwana abalimi abangaphatheka kuwo ngoba ilenzuzo ephezulu.
UMnumzana Pius Ninasi Dube oweMatopo ongomunye wabalimi abafuye ingalukhuni ubikele uMthunywa ukuthi ingalukhuni zithandwa ngabantu abanengi kodwa balutshwana abazifuyayo.
UMnu Dube uthe uselesikhathi eside egcine ingalukhuni njalo uzithengisela abantu abavela endaweni ezitshiyeneyo kanye labomakhelwane.
Omunye njalo umlimi wengalukhuni uMnumzana Ndakachinyeyi Zvirevo uthe ukufuya ingalukhuni kulula kakhulu ngoba akulamsebenzi omnengi njengokufuya ama-broiler.
“Ingalukhuni zidinga ukunanzelelwa kuphela nxa seziqalisa ukubekela ukuze zibekelele endaweni evikelekileyo.
“Umlimi angakwenza ngaleso sikhathi yikuzivalela endlini engasebenziyo ukuze zibekele endaweni evikelekileyo ukwenzela ukuba amatsiyane akhangelwe ngonanzelelo okwamaviki amathathu.
“Umlimi uyabe ekhangelelwe njalo ukuthi kuleyondlu afake itshebetshebe phansi ukwezela ukuthi nxa amatsiyane esiwa angaweli endaweni eqinileyo ngoba elakho ukwephuka ngoba ngaleso sikhathi ayabe engaqinanga,” kutsho uMnu Zvirevo.
UMnu Dube uthe ngemva kwamaviki amathathu umlimi ulakho ukuvulela amatsiyane ngoba ayabe esesenelisa ukuzihambela kanye lokuzidingela ukudla.
“Amatsiyane engalukhuni aqala ngokuphiwa i-starter mash kodwa ngemva kwamaviki amathathu umlimi ulakho ukuwavulela aziphandele,” kutsho uMnu Dube.
Ababona ngezempilakahle lokudla bathi nxa sebekhangela phakathi kwenyama yenkhukhu lenyama yengalukhuni eyengalukhuni iyakha umzimba ngoba ilokudla okunengi okungafunwa ngumzimba.
Online Reporter