admin
Thokozile Mbedzi
INHLANGANISO yeVeterinery Services ikhuthaza abafuyileyo kundawana zonke zelizwe ukuthi baqaphele umkhuhlane wamehlo obizwa ngokuthi yi-opathalmia pink eye wona othelelwanayo phakathi kwezifuyo ezibalisa inkomo, imbuzi kunye lezimvu.
Ekhuluma lentatheli kaMthunywa uDokotela wezifuyo uNdabezinhle Mkhwananzi uthe abafuyi kabaqaphele umkhuhlane we-opathalmia, ohlasela amehlo ezifuyo.
“Umkhuhlane we-opathalmia uyathelelwana ezifuyweni ezibalisa inkomo, imbuzi kunye lezimvu. Umkhuhlane lo uhlasela amehlo njalo uwenza abe bomvu,” kuchaza uDkt Mkhwananzi.
Uthe umkhuhlane lo umemethekiswa zimpukane.
“Isifuyo esesihlaselwe ngumkhuhlane lo sibonakala ngelihlo elihlala likhala njalonje futhi liba bomvu.
“Umkhuhlane lo ubangelwa ligcikwane le-thelazia rhodesic predisposes. Okwenza igcikwane leli lihlasele isibaya somlimi yikuminyana, uthuli kunye lokutshisa,” kutsho uDkt Mkhwananzi.
Uthe ilihlo liba buhlungu njalo kuhle kwenze isifuyo singathandi ukukhanya.
“Ukwelapha umkhuhlane lo kumele kusetshenziswe i-eye powder ebizwa ngokuthi yi-tetracycline efakwa nsuku zonke lejekiseni.”
UDkt Mkhwananzi uphethe ngokuxwayisa abalimi ukuthi balimuke impukane ukuze zingamemethekisi umkhuhlane lo.
Online Reporter