admin
Nkosilathi Sibanda
‘BABETHI KAYI BULAWE……’ Le yingoma ehlatshelwa ngabalandeli beHighlanders nxa iqembu labo lisiyahlasela kwezinye inkundla.
Ngokunjalo, ngoMgqibelo abalandeli beBosso bonke bazabe becula iculo leli ngokuthula njengoba belindele umdlalo wabo wokuqala weligi ngemva kwenyanga ezidlula amatshumi amabili lambili.
Kuzakuba yimpelaviki emnandi, eloluju kubalandeli labathandi bomdlalo kanobhutshuzwayo ukuthi bacine benikezwe ithuba lokubukela iqembu labo lidlala.
Kodwa bazangena bebalutshwane, nanko inombolo zabantu abavunyelwa ukungena zehlisiwe. UHulumende uvumele inhlanganiso yePremier Soccer League ukuthi ivumele abalandeli abangafika i-2 000 emdlalweni ngamunye.
Umqeqetshi weHighlanders uMandla “Lulu” Mpofu ubikele iphephandaba likazulu ukuthi abafana bakhe sebemi ngomumo.
“Kulindelwe ngamehlo abomvu ukuthi siqale umdlalo wethu weligi ngemva kwesikhathi eside,” kutsho umqeqetshi lo.
“Abadlali bayalolonga, akulankathazo. Okukhangelelweyo yikuvula isizini ngokunqoba.”
IHighlanders ingena umango ilubhekise enkundleni yeBlack Rhinos ngoMgqibelo. Inhloso yikuthi uMpofu afike anqobe ukuze avale inhloni zokukhitshwa kumqhudelwano weChibuku Super. IBosso yapakitsha ngokuphangisa inqotshwa yiFC Platinum nge 1-0 kumdlalo wama-quarter final.
Kulindeleke njalo ukuthi umqeqetshi asebenzise ubungcitshi bakhe kulumdlalo nanko phela eqinisweni abadlali beHighlanders badlala angathi abalamathambo.
IBlack Rhinos ayiqaphele kulokho.
Yona iRhinos iliqembu eliqinileyo kodwa ngenxa yokuthi iBosso ifana lokuthi ilambele, ukunqoba kuzabuzwa kuyo.
Ukusekelwa yinkampani yeSakunda Holdings kukhanya kuvuse umdladla kubadlali. Kumahlandla okulolongwa kwaleliqembu, iphephandaba likazulu lizibonele mathupha ukuthi abadlali bazimisele ukuvula isizini.
Abadlali ababalisa uJoel “Josta” Ngodzo, Ariel “Mangoye” Sibanda, Winston “Shumman” Mhango babike ukuba balande umsebenzi. Ukunqoba kusegazini labo.
Kusenjalo, loba kusaziwa ukuthi inkundla yeNational Sports izagcwaliswa ngabalandeli beHighlanders abangaphansi kombuthano we-Team Away, abalandeli laba, labo bonke kwamanye amaqembu balinde ukuzwa inani lenhlawulo yokungena enkundleni. Ngempelaviki edluleyo kumidlalo yeChibuku Super, abalandeli babhadaliswa iUS$20 munye ngamunye.
Imidlalo:
NgoMgqibelo: FC Platinum v Tenax (Mandava), ZPC Kariba v CAPS United (Nyamhunga), Chicken Inn v Cranborne Bullets (Luveve), Black Rhinos v Highlanders (National Sports Stadium), Ngezi Platinum Stars v Bulawayo City (Baobab)
NgeSonto: Dynamos v Yadah (National Sports Stadium),
Bulawayo Chiefs v Triangle United (Luveve), Manica Diamonds v WhaWha (Sakubva).
Online Reporter