admin
Ethel Ncube
KULENDODA yelokitshini leMbizo 5 eKwekwe efele amafufu njengegundwane nanko bathe benatha etshabhini umngane wayo waqala elinye inina elicine lidinga abantu ukuze babahlasele andubana kutholakale ingasekho emgwaqweni amathumbu esegcekeni.
Isiga lesi senzakale mhlaka 27 Mfumfu lapho lo osengumuyi, uLearnmore Shonhiwa akade enatha utshwala koPhiri Nightclub labangane bakhe ababalisa uGuzeni Bayana lo Tesha Alfasi.
Kuzwakale ukuba ngesikhathi benatha elinye inina elalinatha lapho uFlorence Magaisa waxabana loTesha Alfasi okwenza inina lelo ladinga iziqhwaga zamadoda amathathu aqala ukulwisana loShonhiwa labangane bakhe.
Kuthe sekunzima uShonhiwa, Bayana kanye loTesha bazama ukubaleka kodwa ngokuswelakala kwenhlanhla amadoda ayedingiwe abamba uShonhiwa amtshaya waze wafa.
Isidumbu sikaShonhiwa satholakala emgwaqweni siphakathi kwechibi legazi amathumbu esegcekeni.
UMthunywa uxhumane lesikhulumi samapholisa eMidlands ulnspector Emmanuel Mahoko ochaze ukuba udaba olunjalo balwamukele.
“Samukele udaba lwendoda etholakale ifile. Sibophe uFlorence Magaisa njalo sisadinga abanye abathathu abaphatheka edabeni lolu. Sicela uzulu nxa elolwazi abikele amapholisa aseduzane kumbe aphosele ku-suggestion box loba kuyiphi nje inkamba yamapholisa.
“Kulemibuzo esifisa ukuba iphendulwe yilaba ababalisa uEdmore Marete, Prosper okungasatholakalanga isibongo sakhe loGombani kodwa ababonakali,” kuphetha ulnsp Mahoko.
Online Reporter