Online Reporter
Fungai Muderere
NGEMVA kwemidlalo engamatshumi amabili lasithupha kuligi yeCastle Larger Premiership kulisizini, sekuhlohlwe amabhola angu-404.
Umdlalo phakathi kweYadah leNgezi Platinum Stars kuhlohlwe amabhola amahlanu.
Umdlalo phakathi kweYadah leNgezi Platinum Stars ukhiphe amabhola amahlanu, ngemva kokuba iqembu leMiracle Boys linqotshwe 3-2.
Owayengukaputeni wamaWarriors uKnowledge Musona uhlohle ibhola lakuqala leScottland ngesikhathi iMabviravira ikhipha iHerentals College nge 3-1. Abanye abahlohlileyo kuleliqembu nguTymon Machope loTerrence Dzukamanja.
IHerentals ithole elayo elokududuza kuRalph Kawondera.
Osehlohle amabhola amanengi kuPSL okwakhathesi uWashington Navaya, oweTelOne uthole ibhola lakhe lesi-13 emdlalweni lapho abanqotshwe 2-1 yiChicken Inn.
Bekungokwakuqala kuChicken Inn ukunqoba enkundleni ye-Ascot Stadium.
Ukunqoba lokhu kufike ngesikhathi imuli yenguqu isebuhlungwini ngokudlula emhlabeni kukaTendai “Fire” Ndoro, owake wayidlalela iChicken Inn.
Okwakhathesi iChicken Inn iphethe imiklomelo engu-30, kunombolo yetshumi lanye. Itshiyane ngemiklomelo emibili leHighlanders.
Kumdlalo wakhe wakuqala, umqeqetshi omutsha oweHighlanders uPieter De Jongh, iqembu linqobe 2-1 phezulu kweBikita Minerals ngeSonto emini.
Kazange aphuze ukuzibika ukuthi usephendukile kuleli umqeqetshi lo.
“Isiphendukile intshantshu,” kutsho lumqeqetshi enkundleni zokuxhumana.
IBosso ihlohlelwe ngumdlali omutsha, ovele eNigeria uBenjamin Oluwaritimi Adeogun loReason Sibanda.
Ukunqoba lokhu kulethe injabulo kubalandeli beqembu nanko besekwedlule imidlalo emihlanu linganqobi.
Kuliviki kubemnandi lakuqembu leDynamos elitshaye iGreenfuel nge 2-0. Lokhe kwafika umqeqetshi uKelvin Kaindu, kayikanqotshwa iDeMbare kodwa, izembe lokususwa kuPSL liseduzane. Liphethe imiklomelo engu-25, lisemsileni welogu.
ICAPS United inqobe iFC Platinum nge1-0 enkundleni yeMandava. Lo bekungumdlalo wesithathu izimbamgodi zitshaywa.
Okwamanje zikunombolo yesithupha kulogu, lemiklomelo engu-40.
Intshantshu zanyakenye iSimba Bhora lokhe zibambelele esiqongweni selogu.
Inqobe iKwekwe United 3-1. Ngaphansi kukaLuphahla, iqembu leli selithole ukuqina okuzwayo, linqotshwa kanye kumidlalo emihlanu edluleyo.
Selibuthelele imiklomelo engu-53.
Elikunombolo yesibili yiScottland, ilemiklomelo engu-52.
Imidlalo ekhona kulimpelaviki kuCastle Lager Premiership:
NgoMgqibelo: Bikita Minerals v TelOne (Gibbo), Ngezi Platinum v FC Platinum (Baobab), Scottland v Dynamos (Rufaro), Greenfuel v Simba Bhora (Greenfuel Arena), MWOS v Chicken Inn (Ngoni)
NgeSonto: Highlanders v Yadah (Barbourfields), CAPS United v ZPC Kariba (Rufaro), Triangle v Herentals (Gibbo), Kwekwe United v Manica Diamonds (Ascot)
