admin
NguMsilisi Dube
UHLANGOTHI olubona ngezemitshina yokulimisa olweAgriculture and Mechanisation lucebisa abalimi ukuba besebenzise i-solar drier ekomiseni izilimo zabo ukwenzela ukuba zome kuhle zingonakali.
Kubikwa abalimi bavame ukuchaya izilimo zabo ezimanzi elangeni zicine sezingasomi ngendlela efaneleyo.
Ekhuluma lephephandaba likazulu uMnumzana Mike Mwinga ongumanjinela kuhlangothi lolu uthe indlela le ilusizo kakhulu kubalimi abahlala ezindaweni lapho izulu elilokhu lisina khona.
UMnu Mwinga uthe indlela i-solar drier elungiswe ngayo yenza izilimo zome masinyane.
“I-solar drier ifakwa ipulasitiki phezulu elibizwa ngokuthi yi-green house paper eliqinileyo lokumunya ilanga lokomisa isilimo.
“Izikhala eziphezulu zona ngezokungenisa umoya ozancedisana lelanga ukuthi izilimo zome masinya,” kuchaza uMnu Mwinga.
UMnu Mwinga uthe indlela le yokuchaya ihlanzekile kakhulu ngoba umlimi kachayi izilimo egcekeni okungabangela ukuthi zigcwale inhlabathi.
“I-solar drier ivalekile indawana yonke okokuthi ayingenisi ingcekeza njalo umlimi kabambibambi isilimo sakhe kokuphela akwenzayo yikuphakamisa umtshina ngesikhathi esifaneleyo,” kutsho uMnu Mwinga.
UMnu Mwinga uphethe ngokuthi uhlangothi lwabo lulakho ukuncedisana lomlimi nxa esethe wafisa ukuzenzela eyakhe i-solar drier.
Online Reporter