admin
Ethel Ncube
BAKHATHAZEKILE abazali besigabeni seNtalele eGwanda ngabantwababo abangamankazana okubikwa ukuthi kabasafuni ukubuyela esikolo nanko phela ngesikhathi sokuvalelwa emakhaya ngenxa yobhubhane lweCovid-19 besebetshona bebhoda imizi elotshwala futhi benatha behlomile.
Kuzwakale ukuthi abantwana besikolo abanengi, ikakhulu amankazana akubanga lemfundo yaphezulu sebetshona etshwaleni lapho abanatha bethwele ingqamu bephethe besethusela abanye ngazo.
Ekhuluma loMthunywa omunye wabazali bakule indawo uNkosazana Lemuhang Sibanda uchaze ukuba abantwana sebephenduke okunye.
“Amankazana lawa agqoka angathi ngabantu abathengisa umzimba, okuphuma emlonyeni lapha ungeke ukuthande, banatha badakwe baze bazikhohlwe ukuthi bangobani. Nxa uthi uyabakhuza bakutshela ukuthi amehlo kawabone okuqondane lawo.
“Abasakhuzeki ngitsho, labalutshwana ababuyeleyo esikolo angiboni ukuthi kukhona abakuzwayo abakufundayo ngoba bona sebezazela nje amabele.
“Indlela abaziphatha ngayo iyisibonelo esibi kakhulu kwabanye abasakhulayo ngoba labo bazacina belingisela okungayisikho,” kulandisa uNkszn Sibanda.
Ekhuluma loMthunywa uMnumzana Lerato Nqindi Ndlovu oyimbongi njalo eyisakhamuzi sakule indawo uthe okwenziwa ngabantwana kuyesabeka.
“Asazi ukuthi abantwana laba bazakuba ngomama abanjani abathanda utshwala besebancane kangaka. Abasakhuzeki, ungathi uyabakhuza bahlabela enye ingoma ethethisayo enzima.
“Njengabazali ngithi asikhuzeni abantwana, ikakhulu amankazana asetshona ethwele imbodlela zotshwala. Ayisiyo mpilo singalahli amasiko ethu lobuntu bantwana labazali,” kutsho uMnu Ndlovu.
Imizamo yokukhulumisana losobhuku wakule indawo yehlule.
Online Reporter