admin
Nkosilathi Sibanda
NGEMVA kweminyaka eminengi behamba umango omude besiyadinga ukwelatshwa, abahlali besiqintini seSilozwe eMatobo sebezathola usizo lwempilakahle eduzane kulandela ukuvulwa kwekilinika yeSilozwe.
Ikilinika le, eyakhiwe yikhansili yeMatobo Rural District Council, yaqala ukuhlelwa ngomnyaka ka-1995.
Ikhansili le yaqoqa ukubambana lezakhamizi, izizalwane zakuleli ezisemazweni lenhlanganiso ye-World Vision ukuze kuphutshwe lumsebenzi. Izakhamizi zazithola usizo lwabodokotela esibhedlela seMaphisa, esingamakhilomitha ayisitshiya galolunye kusuka esiqintini sabo.
Umaqhuzu weMatobo Rural District Council uMnumzana Elvis Sibanda wazise iphephandaba likazulu ngoLwesibili emini ukuba ukwakhiwa kwekilinika yeSilozwe kuze ngaphansi kohlelo lwabo luka-2015 lokuvuselela ingqubekela phambili ngokwakha amakilinika kuma-Wadi wonke.
“Ikilinika le ize ngesikhathi esifaneleyo lapho ikhansili yethu ihlose ukuzimisela ekuthini wonke ama-Wadi abe lekilinika. Sibonga izakhamizi lenhlanganiso esasebenza lazo ezibalisa ugatsha lwezempikahle lokondliwa kuhle kwabantwana kuHulumende, iUnited Nations, iWorld Vision labo bonke abaphathisayo ikakhulu abantwana bakulindawo abasebenza phetsheya,” kutsho uMnu Sibanda.
“Sikhangelele ukuthi ikilinika yeSilozwe incede abantu abedlula i-3 000 abahlala kulindawo lalabo abakhele eduzane. Besekujwayelekile ukuthi omama abazithweleyo babelethele ezindlini ngenxa yokuthi isibhedlela besikhatshana, khathesi kuzaphela lokhu. Ikilinika isikhona.
“IMatobo Rural District Council iphezulu kokwakha amanye amakilinika alitshumi incedisana lengatsha eziphathisayo kuloluhlelo.”
Iphephandaba likazulu lixhumane lomphathi wezempilakahle esigabeni lesi uDokotela Matthew Mthunzi othe ikhansili yeMatobo yenze kahle ngokuzimisela ukuthi yakhe ikilinika kuzo zonke indawo.
Online Reporter