admin
USEBAHLELILE abadlali bakhe umqeqetshi wama-Mighty Warriors, uSithethelelwe “Kwinji 15” Sibanda kulungiselelwa umdlalo wokuya ku-Africa Women Cup of Nations (AWCON).
IZimbabwe izadlala leqembu leBotswana mhlaka 18 Nhlolanja enkundleni yeNational Sports Stadium.
Umdlalo wesibili uzabe useFrancistown mhlaka 23 Nhlolanja.
Amantombazana elizwe angena enkambeni yokuqeqetsha ekuqaleni kukaNhlolanja.
Umqeqetshi uhlale labadlali abangamatshumi amabili lasithupha abadlala bekuleli. Kumalanga la, uSibanda uthe uthole ithuba lokuthi azwisise umdlali munye ngamunye.
Ekhuluma ecingweni eseHarare, uSibanda utshele intatheli yephephandaba likazulu ukuba wenze konke okusemandleni akhe ukuthi aqinise iqembu.
“Sekungamaviki phose amathathu sisonke labadlali. Ekuqaliseni bekungelula ngoba abadlali bami bebengaqinanga ngendlela.
Ngibathethe ngabafaka kuhlelo engibone lufanele ukuze baqine,” kutsho umqeqetshi lo.
Uthe ulokuthaba ngokuza kwabadlali abaphetsheya uRudo Neshamba, Danai Bhobho, uEmmaculate Msipa loBerita Kabwe.
Ilizwe elizanqoba lizaqhubekela phambili lisiyadlala ku-AWCON eMorocco ngenyanga kaNtulikazi.
Nanti iqembu lama-Mighty Warriors elibuthaniswe ngumqeqetshi:
Onozinti: Lindiwe Magwede (Herentals Queens) Cynthia Shonga (Harare City Queens) Precious Mudyiwa (Black Rhinos Queens) Leona Bhunu (Bulawayo Chiefs)
Imvimbi: Nobukhosi Ncube (Correctional Queens) Egness Tumbare, Moreblessing Bwende (Harare City Queens) Edeline Mutumbami, Vimbai Mharadzi, Liliosa Kandemiri (Blue Swallows Queens) Talent Mukwanda (Herentals Queens) Purity Mugayi, Eunice Chibanda (Black Rhinos Queens)
Abasesiswini: Emmaculate Msipa (Fatih Karagümrük Spor Kulübü, Turkey) Marjory Nyaumwe (Correctional Queens) Shyline Dambamuromo, Alice Moyo (Faith Drive Queens) Mavis Chirandu, Priviledge Mupeti (Black Rhinos Queens) Danai Bhobho (Simba Queens, Tanzania) Ennerty Chemhere (Ubuntu Queens) Berita Kabwe (Rivers Angels, Nigeria)
Online Reporter