admin
Ethel Ncube
ISENZO senye indoda yeLower Colliery eHwange eleminyaka engu-55 siyindaba esegudwini nanko kubikwa ukuba ibulele inina ebithandana lalo kubangwa ukungasebenzi kuhle kwesitho sakhe sangasese.
Indoda le, uJonathan Mabhena oleminyaka engu-55 yokuzalwa kubikwa uhlasele wabulala uGetrude Ngwenya oleminyaka engu-50 kubangwa ukuba isitho sakhe sangasese asisasebenzi.
Kubikwa mhlaka 8 kuyonale inyanga, umetheswacala watheleka koNgwenya, ayethandana laye wafika wamgwaza ngengqamu duze lenkaba lasezandleni esithi nguye obangela ukuthi isitho sakhe sangasese singasebenzi kwabanye abesifazane.
Kubikwa ebona ukuba uNgwenya usethe daca phansi uMabhena wathi nyawo ngibeletha wafulathela.
Umetheswacala kubikwa wabotshwa ngosuku olulandelayo uNgwenya evele esedlule emhlabeni.
Okhulumela amapholisa esabelweni seMatabeleland North uInspector Glory Banda usiqinisekisile isehlakalo lesi.
“Sivule icala lokubulala lapho indoda ehlasele owesifazana ebithandana laye.
Impilo yomuntu iqakathekile kakhulu njalo kumele ihlonitshwe.
“Ukulwa ayisiyo ndlela yokulungisa inhlupho.
Sikhuthaza uzulu ukuba angathwali izikhali ezilimazayo ngoba ucina elingeka ukuzisebenzisa ukudala amacala,” kuphetha ulnsp Banda.
Online Reporter