admin
YiNtatheli kaMthunywa
UKUGQITSHWA kwesizini yemidlalo yenguqu yisikhathi esiletha imizwa etshiyeneyo njalo esihlabusayo kunengi labasekeli labathandi bomdlalo, kodwa ngokuvalwa kwesizini yalonyaka ngoMvulo kuzajabula abadlali abazakhethwa ngoba benze kuhle kumncintiswano kanobhutshuzwayo kuligi yeCastle Lager ka2016.
Intatheli zemidlalo ilizwe lonke, abaqeqetshi labokaputeni babuthana esigodlweni njengeminyaka yonke bejonge ukuphuma lequla labadlali abalitshumi lanye abazadindwa kukhalenda lengcitshi zesizini ka2016.
Inhlanganiso yePremier Soccer League itshele iphephandaba likazulu kuliviki ukuba ngemva kokukhethwa kwengcitshi, kuzakuba lomcimbi omkhulu wokubonga lokunikeza izicoco kubadlali.
Nxa kukhethwa abadlali abazingcitshi kwandise ukugcwala imbono etshiyeneyo mayelana labadlali abathile abakhethwayo. Kumaviki amabili edluleyo sekubangwa emaphethelweni esizini, kuqale ukuphoswa kwamabizo abadlali abangena ehlelweni lwentatheli, abaqeqetshi labokaputeni bamaqembu ayisitshiya galombili kuligi yeCastle Lager.
Kulisizini umbango wokukhethwa ulukhuni ngoba banengi abadlali abakhangelwe ngamehlo ngokutshibilika kuhle.
Ngokunjalo iphephandaba likazulu liphume ladingisisa kubasekeli, ikakhulu labo ababukela imidlalo eminengi.
Ezitaladeni zakoBulawayo kubizwa abadlali beHighlanders uPrince Dube uzangena kukhalenda engancintiswa muntu ngoba ulesicoco sakhe sokuba ngumdlali oyingcitshi obechinsa ukudlala kuPSL.
Bakhona abaqabuke inkundla zenguqu ephakemeyo kodwa abedluli uDube ngokudlala kwakhe kuBosso. Umfana lo obethenjwe ngumqeqetshi uErol Akbay, ubeyinsika yokunqoba kweqembu phezulu kweDynamos njalo uncedise ukuhlohla amabhola eyedlula alitshumi.
Omunye umdlali weBosso obalelwa kungcitshi zika2016 nguPeter Muduhwa.
Kambe ukhona ongalandula lokhu ngemva kokubona ukuvimba okwenziwa ngumdlali lo? UMuduhwa usebatshazwe ngabaqeqetshi ababalisa uMoses Chunga weHarare City loNorman Mapeza oweFC Platinum.
Okuseleyo kuPeter Muduhwa yikuthi abizwe kuqembu lamaWarriors.
Abanye abadlali abajabulise abalandeli abalakho ukudindinsa amabizo abo kukhalenda babalisa uBruce Kangwa loSimon Munawa.
Online Reporter