adminNguEmmanuel Ndlovu
IMVIMBI Arts okuliqembu elidabuka elokitshini leNtumbane koNtuthu, selibetha umoya kulandela ukuhlamuka kwamalunga angu-11 aya kwamanye amaqembu ngenxa yokungezwani.
Amanye amalunga kubikwa atshaya utshani alubhekisa eGoli ngenhloso yokuyadinga amadlelo aluhlaza.
Elinye ilunga elale ukuqanjwa ibizo libikele iphephandaba leli ukuthi ukuhlamuka kwabadlali laba kwabangelwa yikungezwani kwabo lomqondisi weqembu, uBlessed Chakomoka.
“Kujwayelekile kwezemidlalo ukuthi umqondisi weqembu acine esengasaboni ngaso linye lamanye amalunga akhe ngenxa yezinto ezifana lokwabiwa kwemali kanye lendlela iqembu elikhokhelwa ngalo.
“Lokhu yikho okwenza abadlali abadala bacina bebona kungcono ukuthi basuke kuqembu. Abanye balabo abasukayo baya kwamanye amaqembu kukanti abanye balubhekisa eGoli,” kuveza leli ilunga.
Ubuye waveza ukuthi ngomnyaka ophelileyo iqembu leli lehluleka ukwethekelela ilizwe leSouth Africa ngenxa yengxabangxoza le.
Iloba uChakomoka evumile ukuthi kulamalunga atshiya iqembu, uthe umunyu ngesenzo sabo.
“Amalunga ami abalekiswa yindaba yemali njengoba lawe ubona ukuthi kwezemidlalo akula abasisekelayo. Kukanti abanye basebedelela.
“Ngalokhu ngabakhulula ngathi bazihambele lanxa nje ngilokhu ngikhubekile emoyeni ngoba abanye ngabancedisa ukuthatha amaphasipoti ngemali yami kodwa lamuhla bangibonga ngokungihlamukela,” kutsho uChakomoka.
Ubuye wathi khathesi uthole abadlali abatsha abangu-8 njalo usaphakathi kokubafundisa ukusina imigido yomdabu.
Ukuhlamukelana kwamaqembu akoBulawayo sokubhahile kwezemidlalo.
Eminyakeni edluleyo ingxabangxoza ezifanayo zike zezwakala kumaqembu afana le-Thandanani Women Ensemble, Ingwenyama Perfoming Arts, Kwabatsha Dance Company kanye leZiyawa Performing Arts phakathi kwamanye.
Online Reporter