admin
Ngiyindoda etshadileyo, unkosikazi wami wangicela ukuthi ngimhambise esikolo ngemva komtshado wethu lami kangizange ngibe lenkinga ngoba ngingafuni ukuthi athi impilo yakhe ihle yama ngemva kokutshada lami. Savumelana ukuthi sike sime ukuba labantwana aze aqede izifundo zakhe.
Seqedile manje ukufunda kodwa ayikho into esiyenzayo ngaphandle kokuxabana. Sengize ngamtshela ukuthi akangitshele uma engasafuni ukuba sempilweni yami ngoba angazi ukuthi inkinga yakhe ingakuphi. Selenyanga ezintathu eqede esikolo njalo ngeke ngithi ucunulwa yikuswela umsebenzi.
Kangisuye muntu okholwa ekwehlukaneni kwabathetheneyo kodwa angisenelisi ukumelana lesimo lesi engiphila kuso.
Impendulo
Kwezinye izikhathi kuyenzeka ukuthi emva kokufunda omunye azibone esengcono kulomunye kwabathetheneyo. Ingoba yena impilo usuke eseyibona ngenye indlela abesezibona engcono. Kulokuthi le indlela entsha ayihambe lesithandwa sakhe ubona kungcono ayihambe yedwa noma ayoqala impilo lomuntu omutsha abona sengathi usefanelane laye.
Kuyinto eyingozi kakhulu esike yachitha imizi eminengi uma abantu benganakile.
Kuhle ngempela ukuthi angamvumeli lo Sathane ukuthi angene phakathi kwenu. Ulwele umtshado wakho ngokuthi umazise unkosikazi wakho ukuthi ukungawutholi umsebenzi akutshintshi lutho phakathi kwenu. Kubalulekile futhi lokuthi lizame ukwenza izinto ezimnandi njengabantu abathandanayo ukuze unkosikazi angaboni sengathi akukho okokujabulela emtshadweni. Khumbula ukuthi lalivumelane ukuthi lizakhuluma ngabantwana eseqede ukufunda. Ake liyikhulume leyo futhi ukubona ukuthi lisese munye yini. Kungenzeka ukuthi unkosikazi wakho udinga okukwenza okuzamenza ahlale ephathekile ngemva kokuqeda isikolo futhi esalindele lokuthola umsebenzi.
Online Reporter