admin
Nobuhle Mgwaqo
OMELE uMongameli welizwe uKhomuredi Emmerson Mnangagwa useveze ukuba kungumlandu kaHulumende wokufundisa izizalwane zakuleli ngesisekelo sombuso welizwe yikho nje sebesihumutshe ngendimi eziyisificaminwe mibili phakathi kwezingu-16 ezisemthethweni kuleli.
UKhmrd Mnangagwa uveze ukuthi njengelizwe elihlonipha amalungelo alabo abaphila lobugoga isisekelo sombuso sesihumutshwe lange-braille ukuze abangaboniyo labo benelise ukufunda okumunyethwe kuso.
UKhmrd Mnangagwa uveze ukuba balamakhophi angu-5 000 e-braille.
“Ngenhloso yokuthi labo abangaboniyo labo bakwazi okumunyethwe kusisekelo sombuso silamakhophi angu-5 000 e-braille. Lokhu sikwenza ngoba silomlandu wokuthi njengoba silendimi ezingu-16 ezisemthethweni kuleli kumele isisekelo sombuso sihumutshwe ngalezondimi,” kutsho uKhmrd Mnangagwa.
UKhmrd Mnangagwa onguMphathintambo wogatsha lwezomthetho, Justice, Legal and Parliamentary Affairs ukhulume lokhu emkhosini wokuqaphelisa izizalwane zakuleli ngesisekelo sombuso welizwe koBulawayo ngoLwesine ngeviki ephelileyo.
Uthe ingxenye ka-7 yesisekelo sombuso welizwe ipha ugatsha lwakhe umlandu wokuqaphelisa uzulu ngokumunyethwe kusisekelo sombuso ngokuhumutsha isisekelo kanye lokubona ukuba sifinyelela izizalwane zonke zakuleli.
Kubikwa isisekelo sombuso welizwe sesihumutshwe ngendimi ezibalisa ulimi lwesiNdebele, Shona, Tonga, Chewa, Sotho, Kalanga, Venda kanye le-braille.
“Silamakhophi angu-500 000 esiLungu langu-350 000 ezinye indimi,” kutsho uKhmrd Mnangagwa.
Uqhubekele phambili esithi;
“Ingxenye ka7 yesisekelo sombuso isipha umlandu wokuthi sibone ukuba isisekelo sombuso siyafundiswa ezikolo lokuthi siba yingxenye yezifundo zalabo ababona ngokuvikeleka kwelizwe, izisebenzi zamankampani kaHulumende kanye lababona ngomphakathi.”
Online Reporter