adminkuloba uCornelius Luphahla
KULE iviki asike sicazulule indaba ezimnandi emajaheni mayelana lenhlalo kanye lenkuliso yamajaha asendulo kusadliwa ngoludala. Lapha-ke kwakusase lamajaha aqotho ayethi nxa enyathela emhlabathini kuzwale kuze kuvume lasemzimbeni yamantombazana.
Angithi nje intombi layo yayithi nxa kudlula ijaha eliqotho izizwe umzimba wayo ungathi uyadikiza kancane nje.
Hawu! Lapho-ke zihle ziyibulale inhloni iswele lokuthi ingenzani. Yikho phela okwakudala ukuthi intombi ingakaze yezwa ngitsho legama elilodwa elivela ejaheni kodwa ithi ngokuhlanganisa amehlo ayo lawejaha ihle iqale ukuqhwaya phansi ngamazwane.
Yiwo ke amajaha ayabe endunduzelwe ngobuqotho aphiwa lembiza yobudoda obuqotho. Kwakunjalo ekadeni amajaha ayebonakala ezihambela ukuthi lijaha hatshi inengi lamajaha akhathesi ozwa kuthiwa ijaha libalekelwe ngumkalo lisanda ukumthatha. Ekadeni intombi yayingeke yatshiya umendo noma kutheni ngoba isazi ukuthi ihlala ikhululekile emoyeni.
Ijaha elipheleleyo lalingahlali amalanga aze abe mahlanu lingazange lakhuhluzela amasi alo engutsheni zalo. Lokhu kwakuchaza sobala ukuthi yindoda sibili engeke yakhathaliswa ngumizi wayo. Kwesinye isikhathi ijaha lalingakhuhluza amasi la kabili kumbe kathathu ngeviki. Kwakuthi kungaba njalo amakhehla alikhuthaze ngokuthi selingathatha ngoba kukhanya ukuthi libukhali kakhulu.
Kulezinsuku amajaha kawasakwazi ngitsho lokuthi kulento okuthiwa yimbiza. Abanye sebekuzwa ngelika bathi kodwa kabakholwa lokuthi yinto eyake yaphila. Angithi nje ijaha ngokwalo nxa lithe ladlula ligudla intombi kumbe lithe layixhawula kufanele isale isizwa umzimba wayo ungathi uyethuka kancane nje izwe kungathi kukhona ukuyihambayo emzimbeni.
Manje amajaha alamuhla uwathola emile lamantombazana bebambene emphakathini kodwa intombi ingezwa ngitsho lokuthi ibanjwe lijaha kungathi ibanjwe yinkalakatha yekhehla eselimxhiliba. Yikho phela okudala ukuthi ijaha kuthiwe lehlulwe yintombi ngoba livele lehluleka ukuyidonsa imizwa ngomzimba.
Kwakuthi ijaha eliphekekileyo sibili ulibone ngokuthi amantombazana ayabe engathi kawalithandi kumbe kungathi ayalesaba. Lelojaha elinjalo liyabe lilesithunzi sendoda sibili hatshi ijaha elibhuzelwa ngamantombazana nje. Lapha kuhle kuzikhanyele ukuthi akulasithunzi kulelijaha liyazifanela lamantombazana nje.
Yebo kambe kukhona ijaha okuthiwa yilikhwa kodwa amantombazana la ayabe elithanda kawaze azisondeza aze aleyame. Njalo ubukhwa obubonakala ikakhulu ngemva kokuqonywa kwejaha hatshi ngokugcwalwa ngamantombazana. Angithi nje intombi kufanele izizwele vele nxa sisondele eceleni kwejaha ukuthi kayisaphilanga kuhle sokukhona okuyintinyelayo. Pho amajaha akulezinsuku senjani asesehluleka ngitsho lokwethusa umzimba wentombi? Kawayitholanga imbiza yikho nje semana abe zingqukumbane nje.
Sokuzinsizi zodwa kumajaha akulezinsuku sokudingeka ukuba abadala basize bawahlomulele empini le esihlome yahlasela amajaha.
Lokhu kunganceda ukuthuthukisa ubuzwe bethu njalo lemizi eminengi eyabatsha ingaqina sibili kungamani kuhlale kusempini egumeni. Angithi nje indlala kwabesintwana ibonakala ngempi esegumeni, ukungahloniphani kanye lokungakhululeki kukamama weguma.
Kabasize ke abadala bahlanganise umphaphama, umtshibi omduna, umnonjwana kanye lezinye izanzoco engingeke ngazibalisa ngaziqeda baphekele amajaha imbiza.
Thintana lomlobi ku-whatsApp utsho umbono wakho ku 0775722298/ 0737771317.
Online Reporter