admin
Cornelius Luphahla
BATHWELE amagabha avuzayo abesifazana beWilonki esigabeni seMasakeni eGwanda ngendoda okubikwa sihluphile ngokubahlukuluza isebenzisa umubobobo nanko phela ibonakala isiphuma endlini zabo kodwa ingazange ibonakale ingena osokudale ukuthi kube lokungahlaliseki.
Indoda yomubobobo le, okutholakale ukuthi nguForget nje kuphela kubikwa ihlala eMafuko esigabeni seLushongwe kodwa lingavele lingene kunina ibhekisa amabombo eWilonki isiyahlukuluza abesifazana emzini yabo ingabonwa muntu, uMthunywa uyakuveza lokhu.
UMthunywa uxhumane lesinye isakhamuzi sakule indawo uNkosazana Tukoloho Ndlovu wachaza ukuthi indoda le ibonakala nxa siphuma endlini kuphela.
“Mina ngiyadana ukuthi uForget usebenzisa muthi bani wokulalisa ngoba nxa engena endlini kawumboni njalo kawumuzwa umbona sephuma kuphela usale susizwa ukuthi ubulele lowesilisa.
“Kimi wangena kukhanyisa inyanga kodwa ngamuzwa sephuma ngathi ngimlunguza ngihlaba umkhosi wabaleka savuka sesibona ngonyawo kuphela,” kutsho uNkszn Ndlovu.
Ekhuluma lentatheli uMnumzana Talent Dube oyisakhamuzi sakule indawo uchaze ukuthi emzini wakhe indoda le yangena ilanga lisanda kutshona bambona kodwa wabaleka wabatshiya.
“Umuntu lo ugangile sibili ngikhuluma nje kuviki ephelileyo ufikile emzini wami ntambama ngehola lesithupha wathola umntanami oyinkazana ehlezi endlini yakhe wafika wangena umntwana wahle wahlaba umkhosi. Sasuka emkulwini sisiyakhona sambona ephuma ebaleka.
“Sazama ukumxotshanisa kodwa wasitshiya ngoba ulesiqubu somvundla. Ngokubona kwami umuthi wakhe kawuselamandla njengoba sowabhoda isigaba sonke lesi, yikho okwadala ukuthi umntanami ambone,” kuveza uMnu Dube.
UMnumzana Shelton Ncube ongesinye isakhamuzi sakule indawo ubikele intatheli ukuthi inengi lamadoda alapha kalisayi emisebenzini ngoba lesaba ukuba omkabo bengasala bebanjwa yindoda le.
“Amadoda amanengi akule indawo kawasayi ngitsho lemisebenzini ngokwesaba ukuba amakhosikazi awo angasala ebhinywa yisigangi lesi. Ngitsho ngoba kasivamanga ukungenela umuntu nxa elomkakhe asazi kumbe umuthi waso kawusebenzi nxa kunjalo.
“Into esuka isidanise yikuthi amapholisa sihlala siwabikela kodwa ayabuya afike azihlalele ezitolo khonapho isigangi lesi siqhubeka sihlukuluza abesifazana emakhaya,” kutsho uMnu Ncube.
Usobhuku wakule indawo uMnumzana Sizondo ebuzwa ngale indaba uvumile ukuthi uyayazi.
“Indaba kajaha osehluphile ngokuhlukuluza abesifazana ebusuku ngiyayazi njalo sesizame amacebo okubikela amapholisa kodwa lokhu engakambambi,” kutsho usobhuku uSizondo.
Isikhulumi samapholisa esabelweni seMatabeleland South uInspector Philisani Ndebele sibikele intatheli ukuthi indaba enjalo abakayizwa.
“Indaba enjalo asikayizwa ngakho sisahlolisisa ukuthi izakhamizi zibikele amapholisa akuyiphi indawo ukuze sizame amanye amacebo okusibamba isigangi lesi,” kuphetha uInsp Ndebele.
Online Reporter