Online Reporter
Zimpapers Sports Hub
ABAZALI bakhe bamupha ibizo elithi Reason, belesizatho!
Lo ngumdlali weHighlanders osephenduke waba yintandokazi kubalandeli beqembu labanye abalandela inguqu, loba bengalithandi. Umdlali lo usenikeze iHighlanders zonke izizatho zokukholwa, lokuthemba ukuthi izakuba yintshantshu yeligi yeCastle Lager.
UReason Sibanda usetshengise ukuthi ungumdlali olekusasa elihle, olakho ukuthi azakhele impilo enhle kwezomdlalo kanobhutshuzwayo. Ngempelaviki edluleyo, uSibanda utshayelele amabhola amabili egedini, iBosso inqoba phezulu kweqembu leYadah Stars.
Abafana bakamfundisi uWalter Magaya bathole ukubhabhathizwa nguSibanda, nanko inkundla yeHeart Stadium yikho lapho aqala khona, mhla echinsa ukudlala kuligi ephakemeyo, ngesikhathi ebolekwe kuBulawayo Chiefs ngesizini edluleyo.
Nyakenye wahlohla ibhola elilodwa, iBulawayo Chiefs idliwa yiYadah Stars 2-1 enkundleni yeHeart Stadium.
Umdlali lo usuka kumaqembu abasakhulayo kuHighlanders. Kulandela ukuhlohla kwakhe, iHighlanders inqoba, kutsho ukuba leliqembu lisemuva ngmiklomelo emihlanu, kuMWOS, ekhokhela ilogu yeCastle Lager. USibanda engaqhubeka edlala kakuhle, ehlohla kumidlalo yonke, iHighlanders ingakhokhela ingalane, kujabule abalandeli.
Umdlali lo usehlohle amabhola amahlanu kuligi.
Intatheli yephephandaba likazulu ikhulume loSibanda ngempelaviki, waveza ukuthi lonyaka uzavutha enkundleni.
“Isizini edluleyo ibingeyokuqala kuPSL, ngikuHighlanders. Bangihambisa kuBulawayo Chiefs phakathi kwesizini, ngafika ngalwela ukuthi iqembu lingaphumi kuligi, kwehlula. Ukuphenduka kwami kuHighlanders kuze ngesikhathi esifaneleyo. Ngake ngacabanga ukuthi ngiyisehluleki somdlalo ngesikhathi bengisa kuBulawayo Chiefs. Ngaphangisa ngazikhuza, ngathi ngizabuya sengiqinile. Nanko ke, lonyaka ngithembisa ukuyiphakamisa iHighlanders, iqembu elangenza ngaba ngumdlali wePSL. Ngibonga abanye bami engidlala labo kuHighlanders ngoba banginika amathuba wokuthi ngihlohle. Ngibonga futhi lomqeqetshi wethu uKelvin Kaindu ngokubeka ithemba kimi,” kutsho uSibanda.
Uthe uzafuna ukulwela isicoco seGolden Boot.
“Akusoke kube lula. Kunengi okumele ngikwenze, ngikufunde njalo. Ukuhlohla amabhola edlula itshumi kungumsebenzi onzima. Kangifuni ukuzihlupha lokuzithwalisa nzima. Ngisasebenzela ukuthabisa abalandeli bethu lokuthi iqembu linqobe.”
Ukuphenduka kwakhe kwakhankaselwa ngumqeqetshi uKelvin Kaindu ngemva kokunanzelela ukuthi kulethalenta kulumdlali.
“Kuyangithokozisa lokhu esikwenzelwa nguSibanda ngakho khathesi kuqakathekile ukuthi ehlale edlala kanje kuyo yonke imidlalo. Wonke amaqembu alenhloso yawo, eyethu njengeHighlanders yikunqoba,” kutsho uKaindu. Kusenjalo, iligi yeCastle Lager ingena kuviki letshumi lanye kulimpelaviki.
IHighlanders inxuse iFC Platinum eBarbourfields ngeSonto. Omakhelwane, iChicken Inn bangena umango besiya dlala leKwekwe United, enkundleni yeBata, edolobheni leGweru, eNkabazwe yelizwe.
Imidlalo ngokugcweleyo:
NgoMgqibelo
MWOS vs TelOne (Ngoni Stadium); Green Fuel vs Manica Diamonds (Green Fuel Arena); CAPS United vs Herentals (Rufaro Stadium); Ngezi Platinum vs ZPC Kariba (Baobab Stadium); Bikita Minerals vs Yadah (Gibbo Stadium)
NgeSonto
Kwekwe United vs Chicken Inn (Bata Stadium); Scottland vs Simba Bhora (Rufaro Stadium); Triangle United vs Dynamos (Gibbo Stadium); Highlanders vs FC Platinum (Barbourfields Stadium)
