Online Reporter
Ethel Ncube
UMCULI othandwa linengi labantu kuleli, u-Alick Macheso, uncome iqembu leNsimbi zeZhwane, ebika ukuthi bazingcitshi kwezokujabulisa uzulu.
UMacheso, obeqhunsa koBulawayo ngempelaviki edluleyo, wethule amazwi enkuthazo kuNsimbi zeZhwane, kumcimbi oqhutshelwe ePalace Hotel ngempelaviki edluleyo.
Kulumcimbi, kuqhunse uJeys Marabini loChase Skuza.
“Bayazi abakwenzayo amadoda la. Nxa utshaya enkundleni ezinje koBulawayo, njengomculi uyakhululeka nxa kuleNsimbi zeZhwane ngoba balabalandeli abanengi njalo bazingcitshi emsebenzini wabo,” nguMacheso lo.
Umculi lo uphinde wabeka inhlonipho kuJeys Marabini loSkuza. Ubonakale eguqa phansi esitikini, ebeka inhlonipho kubaculi bobabili. Kuthe lapho eqeda ukucula, uMacheso ubonge uzhizhi lwabantu abakade bekhona, ngolimi lwesiNdebele.
“Ngiyabonga bantu bakithi,” nguMacheso lo, esePalace Hotel.
UMacheso uncome njalo ukubambana okukhona phakathi kwabaculi labanye abasebenza kwezomculo. Uthe umculo kawukhethi mhlobo, umbala kumbe indawo.
Iqembu leNsimbi zeZhwane belisesitikini okwesine loAlick Macheso, lokhe baqala ukuhlabela.
Intatheli ixhumane lomaneja weNsimbi zeZhwane uBahlanu Sibanda othe:
“Bekugcwele phamu abantu ePalace, belande ukuzobona ezinkulu zisenza umsebenzi. Bekungalula ukuthi uzwe kuthiwa uyemcimbini, uyahlangana lezinkulu, lawe ulungise waphelela iqembu lakho, uzibuza ukuthi kuyozala nkomo bani. Bekumnandi ukuba sihlanganyele lomhlabeleli odumileyo uMacheso, laba abahlabeleli kudala besemculweni, kungakho bazi okunengi ukudlula thina siyabahlonipha njalo sifunda kibo izinto ezitshiyeneyo,” kubika uBahlanu.
Ubuye wabonga abalandeli ngokubasekela,
“Abantu bathi besizwa kuthiwa siyatshaya loMacheso basithembisa ukuba bazabuya basisekele, lakanye babuya ngobunengi abantu bakoBulawayo. Sibonga uthando lwenu lokuza emcimbini lo sibuye sibonge lokuba loAlick Macheso, kuhle ukuba iqembu lethu lifinyelele kwezinkulu, sithole okunengi, sifunde okutshiyeneyo,” kutsho uBahlanu.
