Silahlekelwe yimiklomelo: Benjani

 

Nkosilathi Sibanda

UMQEQETSHI weHighlanders, uBenjani Mwaruwari, uvumile ngemva komdlalo ukuthi iqembu lakhe lilahlekelwe yimiklomelo eqakathekileyo ngemva kokulingana leSimba Bhora, ngeSonto eBarbourfields.
UMwaruwari uthe iSimba Bhora idlale kuhle esigabeni sokuqala somdlalo njalo yenza iqembu lakhe laba lobunzima.

“Silahlekelwe yimiklomelo emibili. ISimba Bhora ibe lecebo elihle njalo isidlule ngamandla esigabeni sokuqala. Kasidlalanga ngendlela esijwayele ukudlala ngayo. Emidlalweni emithathu loba emine edluleyo besilokhe sivumela amabhola phambili, njalo nxa uvumela lokhu, amathuba okunqoba ayehla. Kumele sisebenze kakhulu ekuvimbeni,” kutsho lumqeqetshi.

“Senze ngcono ekupheleni kwesigaba sokuqala. Kusukela lapho siqale ukudlala ngcono, lanxa kungenzakalanga ngendlela ebengifisa ngayo.”

Kweminye imidlalo, eChahwanda Stadium kube ngumdlalo obugcwele amabhola phakathi kwamambule lapho iHardrock leCaps United ezibambane nge 3-3. IHardrock iqhubeka isendaweni yesibili kulogu yeCastle Lager ilemiklomelo engu-39, ilomdlalo owodwa esandleni. ICaps United yona isendaweni yesihlanu ilemikloomelo engu-35.

EHarare, iDynamos ibonise amandla itshaya i-Agama 4-0 eRufaro Stadium, yakhwela yaya endaweni yesithupha ilemiklomelo engu-34 njalo ilomdlalo owodwa engakawudlali.

IHerentals College ithole ukunqoba okuqakathekileyo nge1-0 phezu kweTriangle United eGibbo Stadium, yaqina endaweni yesine ngemiklomelo engu-36, ilingana leNgezi Platinum Stars.

IManica Diamonds yona ithole ukunqoba kwayo kwesithathu ngemva kokutshaya iZPC Kariba 1-0 eSakubva.
Phezu kwetafula, iScotland FC iyaqhubeka ikhokhela ile-46 ngemva kwemidlalo engu-21, ilandelwa yiHardrock (39), iNgezi Platinum Stars (36), iHerentals College (36), iCaps United (35), iDynamos (34) leHighlanders (33).

Kumidlalo ezayo, ngeviki lesi-22 eleCastle Lager, iScotland ezamukela iTelOne eRufaro ngoLwesihlanu.
NgoMgqibelo, iBulawayo Chiefs izavakatshela iSimba Bhora eWadzanayi kuthi iHighlanders iye eMandava Stadium lapho ezadibana khona leFC Platinum.

NgeSonto, iDynamos izadibana leMWOS, kuthi omunye umdlalo omkhulu ube phakathi kweHerentals College leHardrock eRufaro Stadium, lapho womabili amaqembu azalwela ukuhlala eseduzane lezihamba phambili etafuleni.