Online Reporter
OMUNYE umbalisi owayengifundisa wayethi nxa isikhathi semihloliso sesisondele uzwe ethi ukufunda kufana lomuntu olimayo esivandeni sakhe nxa ubukade uhlanyele amagwili uzavuna wona, nxa ube uhlanyele inyawuthi yiyo kanye ozayivuna. Ngeke uthi uhlanyele umumbu uvune amatamatisi lokhu wayekutsho nxa esehleka usulu kulabana akade bedlala bengabali ukuthi balungiselele imihloliso.
Wawumuzwa esekelela esithi leziyana ezingamahlongandlebe akade zithi zikhuzwa zimise umdlambulo zivuse umhlonga okwenkunzi yebhubesi isethusela okungompisi okufuna ukuthatha impala eliyibiyeleyo, ahleke athi bazabona inkanyezi kulamayezi.
Mina ngilifisela inhlanhla yamaswazi kwababhala imihloliso ezikolo lemakolitshini libambe ziqine liphumelele ukwenzela ukuthi libe lekusasa elihle. Ngikhuthaze njalo labantu abahlala ikakhulu emihlubulweni yasemaNdebeleni inengi labantwana bakhona bebengelandaba lesikolo bethembe ukuya eGoli, pho-ke nanso iGoli isivuke ukeketane izizalwane zakhona zithi azisafuni abavela kwamanye amzwe ngoba bebathathela imisebenzi bacine bevumela ukuthi ababuyiselwa emuva.
Ngikhuluma kunjenje abanye kade bahamba bathe sebeduduliwe baphenduka bathola lemizi seyadilika ngapha umuntu uyabe elabantwana abafuna ukuya esikolo, yikho ngithi lobuya ubumbulu bokuthi ngizakuya eGoli ungenzi imisebenzi ophiwa ngababalisi buphele du, funda kulabo abanye abaduduliweyo kulapho ozabona ukuthi impilo inzima.
Kuzakugqugquzelwa ukuthi ufinqe izidwaba uvule ukhakhayi izifundwe zingene. Ngiyaphinda njalo ngithi libe lokubhala imihloliso okuhle lingatshaywa luvalo mhlawamalanga emihloliso.
Ayixabene.
