admin
YiNtatheli kaMthunywa
AMALUNGISELELO okulima insimu engamahekitha adlula amabili eyeSiphala senkosi endaweni engaphansi kwenduna uGampu eTsholotsho asekuzinga eliphezulu nanko phela impahla yokulima isifikile esigabeni lesi njalo kukhangelelwe ukuthi uhlelo lolu luphakamise indawo le.
Ikhuluma loMthunywa ngoLwesibili iNduna uGampu ithe njengesigaba bajabule kakhulu ngoba sebamukele impahla yokulima evela kuHulumende yeSiphala senkosi.
“NgoLwesihlanu kuviki ephelileyo samukele inhlanyelo yomumbu, itsheda kanye lenyawuthi. Sinikwe njalo lamasaka amahlanu ama-50kg efethalayiza yomhlobo weCompound D kanye lamanye amahlanu awe Ammonium nitrate.
“Imithi yemikhaza, eyokubulala ukhula kanye leyokufafaza izilimo yiyo engakafiki, kodwa ke sithanda ukubonga kakhulu uHulumende ngempahla le asesinike yona njengoba nje izulu likhanya likhona lonyaka sikhangelele ukuyitshaya inala.
“Sizasebenza nzima ukuze silwise indlala lapha ngoba khathesi osekufunakala nje kuphela ngamandla ethu okufuna imali sesikunikiwe,” kuchaza induna uGampu.
Uqhubekele phambili esithi lonyaka bazalima insimu le eyedlula amahekitha amabili ngenkomo.
“Umsebenzi wensimu yethu yeSiphala senkosi siyawubambisana, kweminye iminyaka kwakube lula ngoba ngangingene ngilime ngethalakitha, kodwa lonyaka sikhangelele ukuthi labo abalimayo babuye lenkomo bazolima.
“Lokhu kayisiwo msebenzi onzima ngitsho ngoba ngilekhomithi engincedisayo njalo yiyo eqoqayo ibone ukuthi okumele bangene ensimini ngobani,” kuchasisa iNduna uGampu.
Ubuye njalo wabonga abe-campfire kanye lekhansili yakule indawo ngokubathengela ucingo kanye legedi lokubiya insimu yesiphala senkosi.
INduna uGampu iphethe ngokucela usizo lokulungiselwa isibholane esisenzimini yeSiphala senkosi ukuze izakhamizi zenelise ukulima kathathu ngomnyaka.
“Silesibholane esingasebenziyo esidinga nje ukuthi sifakwe i-solar system kanye le-submissive ukuze sithole amanzi okuthelela. Kungaba njalo siyabe sesizaphumelela njengesigaba ngoba siyabe sesisenelisa ukuthi silime kathathu ngomnyaka. Lokhu kuyabe sekusitsho ukuthi abaswelayo esigabeni sebezaphila ngcono ngoba kuyabe kungasela sikhathi lapho esingathi akulalutho emasimini ethu,” kuphetha iNduna uGampu.
Online Reporter