admin
KULEZINSUKU sokuyinto eyimvama ukuthola indaba ezikhuluma ngamasela agqekeza izitolo, izindlu kunye lamabhanga njalo ehamba ehlomile ngemibhobho ephelele.
Akusamangalisi ukuzwa ngabantu abatshontshelwe impahla yonke endlini ngamasela agqekeza indlu, angene abethusele ngezikhali ezitshiyeneyo andubana abuthe konke okusendlini.
Amanye akhona kawasesabi ngitsho lokulandela imota ezithwala imali ziyisa emabhanga. Ahlasele athi eqeda lapho adliwe ngumswenya lezigidi zamadola ebezisiya ebhanga.
Kukhanya angani isibhamu sesiyinto engesabekiyo kubogubuzela abanengi ngoba sebehamba bezithwele indawo yonke. Kuthiwa abanengi vele sebelazo njalo nxa kuyikuthi uhlangane labo bathi ubaphe imali kungangcono wenze kanjalo ungalwisananga labo ngaphandle kwalokho ungahle uwavalelise amabele.
Ukuthi bayithola ngaphi le imibhobho kusuka kusididanise amakhanda ngoba wona umcabango wokuthi kulabantu esihlangana labo sikhulume labo nsuku zonke abahamba belezibhamu ezikhwameni uyethusa. Okunye okutshwaqisa umzimba yikuthi laba abantu baphatha nje imibhobho le bengafundelanga ngitsho lokuthi isetshenziswa njani okwabo konke bakufundela kumafilimu kamabonakude.
Kuyinto esukumisa inwele ukucabanga ukuthi kwelinye ilanga lowomuntu ophethe isikhali lesi esesabekayo angahlasela lapho okhona.
Kuyadanisa ukuthi kungani amacala la esesanda? Kungani njalo abantu balamuhla sebelezibindi ezesabeka kangaka? Kudala inkafulakufa yayiphathwa ngabomthetho nje qha ngoba kuyibo abafundele ukuthi isetshenziswa njani njalo kutheni.
Kambe sekungeneni esizweni sakithi Mthwakazi sokuhlaselwa ngezibhamu emini ligwaze umhlaba.
Abanye bangathi yinsumansumane yendaba kodwa kwenzakele khonapha esigodlweni samakhosi, kumaviki ambalwa edluleyo lapho amasela ahlasela imota ethwala imali yakoZupco isiwa kwelinye ibhanga elisenzikini yedolobho. Amasela la, atshontsha imali eyedlula amamiliyoni amabili.
Umkhuba lo besijwayele ukuzwa ngawo kwamanye amazwe anjenge Melika leMzansi Afrika kodwa kulezinsuku lokhu kungathi sekusanda kusukela kuminyaka embalwa eyedluleyo.
Abantu kabasakhululekanga loba behamba ezitaladeni ngoba kabazi ukuthi mhlawumbe lowo oseceleni kwakhe nguye isitha esikhulu.
Kuyonale iviki edluleyo kulamasela abehlomile ahlasele imota njalo ethwala imali koChivi athatha imali engaba yi-US$35 000, R350 000 kanye le$2 000. Ukwanda kwamacala la sokuze kukhathaza ngitsho lamapholisa akithi.
Kambe kungabe kungumoya bani osungene abantu bakwethu? Kungani abantu sebefuna ukunotha masinyane ngoba yikho kanye okuthuma abantu ukuthi bayodala amacala afana lalawa. Nxa kuyikuthi ukuvakatshela kwamanye mazwe yikho osokwabaxhwalisa ngalindlela kuzathiwani kambe?
Kungumbono waleliphephandaba ukuthi udlakela ngeke lusilethele lutho bakwethu kodwa ukufunda ukuzisebenzela yikho kuphela okungasilamulela.
Online Reporter