Online Reporter
Zimpapers Sports Hub
INHLANGANISO yeCastle Lager Premier Soccer League (PSL), ikhona kumbukiso wamabhizimusi oweZimbabwe International Trade Fair (ZITF) koBulawayo, lapho ehlose ukuthuthukisa ubudlelwano bayo lamabhizimusi kumdlalo kanobhutshuzwayo.
Ukuba khona kwe-PSL kuZITF kuyisitshengiselo sokuzimisela kwalinhlanganiso ukuguqula indlela esebenza ngayo, kutsho isikhulumi sayo, uKudzai Bare.
“Leli lithuba elikhulu kithi. Silapha ukuzothuthukisa, simakethe umdlalo wethu. Okubaluleke kakhulu, yikuxhumana labantu abakholelwa kumdlalo webhola, kusukela kubalandeli, abaxhasi labanye abatshisekela ukusisekela,” kutsho uBare.
Wengeze wathi: “Sifuna ukufunda ukuthi amankampani aqhutshwa njani. Lokhu kuzakwenza ukuthi kubelula ukuqhuba inhlelo zethu. Lokhu kuzasisiza njalo ukuthi sicabange ngendlela ehlukeneyo, eletha impumelelo emdlalweni wethu.”
Kumbukiso wayo eZITF, inhlanganiso yePSL ithe izatshengisa imbali yomdlalo leligi, iphinde inike abalandeli bakanobhutshuzwayo imivuzo ethile, Ngenjongo yokuthi idonse inengi labantu ukuthi lilandele umdlalo.
“Sisebenzisa umbukiso lo ukuthi silalele okutshiwo ngabantu. Yini abalandeli bethu abafuna itshintshwe? Bafunani abaxhasi bethu? Asikhulumi nje, kodwa sifuna ukuthi sizwisisane, sithathe imibono ezathuthukisa umdlalo,” kutsho uBare.
Kubalandeli bakoBulawayo, abathathwa ngokuba lentshisekelo enkulu elizweni, ukuba khona kwePSL kuZITF kuqinisekise ukubaluleka kwedolobho leli kumdlalo wenguqu.
“Siyazi ukuthi koBulawayo abantu abanengi bayalithanda ibhola. Sifuna ukuvuselela loluthando, siqinisekise ukuthi iPSL yinto abantu abazigqaja ngayo,” kutsho uBare.
“Lesi yisiqalo. Sifuna ukuqhubeka ngokwenza ngcono, sakhe iPSL ejabulisa abantu, ezaletha abasekeli bemali kujabule amaqembu labadlali,” nguBare lo.
Imidlalo ekhona:
NgoLwesihlanu
Herentals College v Greenfuel (Rufaro)
NgoMgqibelo
TelOne v Highlanders (Bata), Bikita Minerals v Ngezi Platinum (Gibbo), Yadah v CAPS United (Rufaro), FC Platinum v Triangle (Mandava), ZPC Kariba v Scottland (Nyamhunga), Simba Bhora v MWOS (Wadzanayi), Manica Diamonds v Chicken Inn (Sakubva)
NgeSonto
Dynamos v Kwekwe (Rufaro)
