Budingani utshwala esikolo?

ISIKHATHI sezemidlalo ezikolo ngesinye sezikhathi lapha abatsha abathaba baze bedlulise amalawulo, uthole bekhelela utshwala esikolo sengathi basebhawa.
Kuviki ephelileyo ngike ngavakatshela kwesinye isikolo lapho obekulemincintiswano yokugijima khona. Bekuncane indawo abafundi bedakwe okungakaze kubonakale. Imibuthano yemidlalo, iyingxenye yezifundo ngakho kungimangalisile ukuthi abangane labayana engababonayo bona bahlanganisa izifundo lotshwala ngaliphi?

Kulusizi ukuthi abantwana besikolo balomkhuba wokuthatha imibuthano le ukuthi benze ukuganga okungelani lezifundo zabo.

Bekumnandi sibili ukubona abantwana bebindana kutrack kodwa ukudakwa kanye lokulwa okucine sekusenziwa ngabanye abantwana kuvele nje kwaphambanisa ubuhle bemidlalo le.

Futhi abantu abalanto enhle. Kungathiwa fundani wayawaya lingaphumuli abantu bahwabha lapha kudume phansi, ufice abanye sebengababhankayo ngoba khona ukusebenza umuntu engaphumuli kuvele akumnandi ngitsho lakancane.

Isimanga yikuthi izikolo nxa sezisenzela imdlalo yokuthi kesizithokozise siphumuze lengqondo thina sisuka sizenzele okwamakhanda ethu.

Lanxa kuthiwani akulamphathi ongavuma ukuthi isikolo sakhe siphendulwe sibe yibhawa kumbe iboxing ring ngabantwana besikolo. Lokho phela akuwisi isithunzi sesikolo kuphela kodwa kuwisa lesakhe umphathi uqobo.

Ngikhumbula ngensuku lami ngisafunda kwesinye isikolo khonapha koBulawayo, kwakusithi kungavele kube le-function esikolo kwakungekeli ukuthi kubanjwe ababili abathathu bedakiwe kumbe sebekhuphene amazinyo besilwa.

Akusi labafana bodwa abenza lokhu kodwa lamantombazana. Abanye badakwa baze bakhohlwe ukuthi basesikolo nanko phela bacina bebanjwa bezitika ngamacansi esambuzi sesikolo.

Ezinye izithutha ziyengwa ngabangane zitshelwe ukuthi ilanga lamasports lilanga lokukholisa. Lelo liqiniso sibili kodwa owathi ukukholisa yikudakwa, ukulwa ngubani?

Bakhona esebeyizidakwa ezipheleleyo bengabantwana besikolo abangasameleli ukuthi kube ngamasports ukuze badakwe. Labo ke lanxa umuntu esiza ekilasini ubuya buvele bubila ekhanda, uzwe umuntu esithi, “mina vele nxa ngingadakwanga angikwanisi lutho.”  Ngamanga bani lawo owatshela abantu, uzenzisa nje. Noma kuthiwa abantu bayatshiyana kodwa lokho angikuvumi ngitsho lasephutsheni lami.

Kukho konke okwenzayo mngane yazi ukuthi impilo oyakhayo kumbe oyibhidlizayo ngeyakho. Kusasa nxa umuntu esekhonjwa indlela ngabaphathi besikolo abasebiza amaloyo yena kunguye oziloyayo. Asizinukeni amakhwapha bangane. Sihlangane njalo.