admin
Ntandoyenkosi Dumani
Ndotjida ndotjidisa ndotjigugutila
Sendilo yekuni inozipisa busebo ndotjibigidzila
Senlume wegumbo dukununu ndotjibinda
Semwana unabibo patjaswika dzimwe njudzi ndohalawula
Tjozipa tjozipilila tjozipisa
Tjakakola tjipabi tjinabutjenjebvu
Atjitotukana atjitotolikiwa tjoleba tjipedza
Tjinahaya tjogongobola atjitokumbila zwibhatigwa
Atjitoleba tjibva tjiti tjabe tjizana zwatjo
Patjaleba tjapedza usingahake ngayende
Igona tjokona tjakakwangwanyala
Patjakunhiwa ndomuka munyu ndikagwa
Kukavunika zwikeyi nezwitiropo ndikasihake wha
Ndotjituta ndotjisa yeno nayeno sabankambutjigwa
Ndotjikudza ndotjikuswa ndotjiteswesa tjowobebuhali
Ndotjibundila ndotjidzikila ndotjidilidzila tjowokombola
Tjowhokula tjikadila mitjelo tjikayibva towotjongongodza
Tjowokula tjowosinila towonyalulukwa muntuzi watjo
Ndotjida ndotjidisa ndotjigugutila
Tjinhaka yatinhodla tikasiyilana tikapelela
Tjimbuba yegwendo tjowotisimisa tikadzina tikanoswika
Tjinkwa tjesubvu towodla mutjilimo tikan’wa vula
Tjidlo tjen’ha todla tikasiya tjidli tjikakon’wa
Ndotjida ndotjidisa ndotjigugutila
Baka beti banotjibulaya netjivukidzila pasi
Kati basudza batjidzwala tjowomela tjikakula
Baka beti banotjibulaya netjitema nhabi tjikadila mitjelo
tikadla
Bakabe beti banotjitutisa nemfuhe wembengawhonye
Kati bahoka nyutji dzowobaluma banotombola
lubolela
TjiKalanga igona tjakakomba tjakakona befupa nebe bun’wa
Nanasi yetjetji tjakakomba totjinazwa tjitjatjila
Tjitjawhotjila
Igona tjakakomba tjakakona tjakakwangwanyala
Ndotjida ndotjidisa ndotjigugutila!
l Kalanga Language and Cultural Development Association, [email protected], +263 772 610 726
Online Reporter