admin
Nkosilathi Sibanda
LONYAKA kukhala kuze kukhale lenkokheli zomdlalo we-hockey emhlubulweni ongezansi yelizwe lapho osekubikwe ukuba kulisizini akusoze kube lemincintiswano elomvuzo wemali, nanko lemidlalo yakuqala ikhangelelwe ukuqhutshwa mhlaka 20 kulinyanga.
UMthunywa uthole udaba lokuthi imidlalo yeligi ye-hockey koBulawayo izahlawulelwa ngabadlali bamathimu wonke afuna ukuphatheka kuligi le kulisizini. Inhlanganiso yeMatabeleland Hockey Board ithumele umbiko ngesimo sokoma kwesikhwama sayo lonyaka, yabika ukuba loba ingela mali, imidlalo izaqhubeka njengokuhlela kwabo.
UKalpesh Parshtam, olilunga leMHB elibona ngezokukhitshwa kombiko, ubikele iphephandaba likazulu ukuba amathimu wonke asetsheliwe ukuthi kuzamele abhadale indleko zokusebenzisa inkundla. Imidlalo ye-hockey koBulawayo idlalelwa enkundleni yeKhumalo.
“Siphakathi kwesikhathi esinzima kumdlalo we-hockey. Eminyakeni edluleyo besijwayele ukuthi sincediswe ngamankampani athile. Kodwa ngenxa yokuthi amankampani la lawo asebunzimeni, akuzange kube lula ukuthi sithole usekelo olufanayo.
“Ukuswelakala kwemali akutsho ukuthi sekumele sime ukudlala. Imidlalo yalisizini iyaqala mhlaka 20 ngakho asibuyeli emuva. Amaqembu avumile ukuthi azahlanganisa imali yendleko ezibizwa ngabanikazi benkundla,” kutsho uDu Pleiss.
Amathimu akhangelelwe ukuthi adlale kulisizini abalisa iBulawayo Athletics Club, iBulawayo Hockey Club, iNational University of Science and Technology, iFalcon College, iGirls College, iChristian Brothers College leBulawayo Vikings.
Kusenjalo umongameli weHockey Association of Zimbabwe uHumpfrey Chigwedere ukhuthaze amalunga enhlanganiso yabo ukuthi badinge amanye amaqhinga ukuze umdlalo uqhubekele phambili lonyaka.
“Isimo esikhangelane laso silakho ukubuyelisa inhlelo ezinengi emuva. Sikhuthaza ingatsha zonke zomdlalo ukuthi zizimisele. Lathi njengenkokheli siphezulu kokudinga amacebo wokubiza njalo usekelo oluthile.
“Loba amaligi aphansi eswela ukuncediswa, siyathokoza ukuthi ithimu yesizwe ayisoze ithwale nzima nxa isiyancintisa. Umdlalo we-hockey awusoze ubhidlike.”
Ngomnyaka odluleyo inhlanganiso yeMatabeleland Hockey Board yaphiwa ithuba lokuqhuba imidlalo yamazwe eAfrica kumncintiswano weAfrican Hockey Club Championships enkundleni yeKhumalo.
Online Reporter