admin
YiNtatheli kaMthunywa
NGEVIKI edluleyo iphephandaba likazulu laba ngelokuqala ukubika ngokugcweleyo ukuthi umqeqetshi weChicken Inn uJoey Antipas usesiya qeqetsha iAmaZulu FC eSouth Africa kudaba olwalulesihloko esithi: UJoey Antipas ukhonjiswa yi-AmaZulu.
Izolo ikomithi yenkokheli zeChicken Inn zithumele uMthunywa umbiko wokuthi sezivumelane ukuthi zehlukane lomqeqetshi lo ngoNtulikazi.
Umgcinisihlalo weChicken Inn uLifa Ncube kumbiko wakhe ophethwe liphephandaba likazulu uthe:
“IChicken Inn ibika ukuthi umqeqetshi uJoey Antipas lomsekeli wakhe uPrince Matore bazatshiya umsebenzi mhlaka 1 kuNtulikazi ngo2016.
“Sebevumelane ukuyasebenza kuAmaZulu FC iqembu leSouth Africa.”
UNcube uqhubeke wabika ukuthi loba abaqeqetshi laba sebesuka, kuzamele bagcwalisise izithembiso zabo zokuqeqetsha iChicken Inn kuhle kumidlalo eseleyo.
“Bobabili bazimisele ukuthi bagcwalisise izithembiso zokutshiya iqembu lisendaweni engcono,” kutsho uNcube.
“Sikhipha umbiko lo ukuze siqede amahungahunga ngaloludaba kanye lokuhlonipha abadlali labo bonke abasebenzelana leqembu.”
Umgcinisihlalo lo uthe bafisela uAntipas loMakore inhlanhla.
“Sizadinga abanye abaqeqetshi abazavala isikhala esitshiywe ngabaqeqetshi laba.”
Kusenjalo, iAmaZulu ibika ukuthi uAntipas usesayine isivumelwano leqembu leli.
Umaneja omkhulu weAmaZulu uLunga Sokhela uthe konke sekulungile ukuthi uAntipas aqale umsebenzi.
“Sesiqedile konke okumele kwenziwe loMnumzana Antipas. Kuyasithabisa lokhu,” nguSokhela lo ku-website yeAmaZulu.
“Lo ngumuntu ozayiphakamisa iAmaZulu njalo uzancedisa ukuthi siphenduke kuPremiership ngesizini ezayo.”
Online Reporter