admin
UGATSHA olubona ngezisebenzi olwePublic Service, Labour and Social Welfare lunike isiqiniseko kuzo zonke izisebenzi zikaHulumende weZimbabwe sokuba akulazisebenzi ezizaxotshwa umsebenzi lapho kuqhutshwa uhlelo lokukhangela inani lezisebenzi zikaHulumende ngenhloso yokuthi ingatsha zakhe ziqale ukusebenza njengemfanelo njalo kungadlaliswa mali.
UMphathintambo wogatsha lwezisebenzi uNkosikazi Prisca Mupfumira uchaze ukuba ugatsha lwezisebenzi luzaxoxisana lalaba abamela izisebenzi bencedisana leNational Joint Negotiation Council ukuze konke okuphathelane lezisebenzi kukhangelisiswe.
UNkkz Mupfumira ukhulume la mazwi emkhosini omkhulu wokuthakazelela izisebenzi enkudleni yeRufaro ngoMvulo kuyonale iviki kunanzwa ilanga lezisebenzi iWorkers Day.
UNkkz Mupfumira ubike ukuba uHulumende ukhangelele ukuba uhlelo lolu luzancedisa kakhulu endabeni zemali yezisebenzi.
“Uhlelo lolu oluphathelane lokulungisiswa kwendaba yezisebenzi luza luhlose ukubona ukuthi imali zisetshenziswa ngendlela njalo luzakwenza uHulumende abesesimeni esingcono kwezemali.
“Ukulungisiswa kwemisebenzi lokhu kuzenziwa lugatsha lwezisebenzi lusebenzelana leNational Joint Negotiation Council.
“Ngithanda ukuqonqosela ukuthi akulamuntu ozaxotshwa umsebenzi ngesikhathi siqhuba uhlelo lolu,” nguMphathintambo Mupfumira lo.
UNkkz Mupfumira uthe uHulumende uzimisele ukulungisisa zonke izikhalazo zezisebenzi, lokhu kusobala nanko phela uHulumende walungisisa umthetho owabangela ukuxotshwa imisebenzi kwabantu abanengi nyakenye.
Wengezelela wathi kukhona eminye njalo imithetho elokhu isalungisiswa.
UNkkz Mupfumira uphinde wathi kuqakathekile ukuthi izisebenzi zikaHulumende zisebenze ngokubambana ukuze isizwe sibelengqubelaphambili.
Okhokhela inhlanganiso yeZimbabwe Federation of Trade Unions uMnumzana Kennias Shamuyarira laye ukhulume ngezikhalazo zezisebenzi ezigoqela ukutshabalala kwamaqembu amela izisebenzi, ukuphuza ukuhola kwezinye izisebenzi lokusebenza kwabanye abantu endaweni ezingaphephile.
Umgcinisihlalo weApex Council uCecilia Alexandra ukhuthaze uHulumende ukuba aqoqe umhlangano ngokuphangisa phakathi kukaHulumende leApex Council ukuze kulungisiswe udaba lwezimali zezisebenzi, ukubalwa kwezisebenzi zikaHulumende kanye lokulungisiswa kweziphathelane lokuqhatshwa kwezisebenzi.
“Sibonga kakhulu uMongameli welizwe ngokubona ukuba izisebenzi zithola amabhonasi njengokuthembisa kwakhe, sithemba njalo uzasimela afuqe ukuba sihole imali engezeliweyo engasiphathisa ukuba siphile lezimuli zethu”, kutsho uNkszn Alexandra.
Umqondisi omkhulu wohlelo lwabasebenzi uHopolang Phororo uphethe ngokukhuthaza uHulumende ukuba engakhangeleli izisebenzi phansi ngoba ziqakathekile, waphinda njalo wachaza ukuba izisebenzi ziqakatheke kakhulu ekukhuliseni umkhonomi welizwe.— Herald
Online Reporter