admin
YiNtatheli kaMthunywa
UMPHATHINTAMBO wezemidlalo uAndrew Langa uyazethemba ukuthi uhlelo alukhokhelayo olweNational Sports Policy yilo oluzalungisisa konke okonakeleyo kwezemidlalo kuleli.
ULanga ubike ngokuzethemba ukuthi uhlelo lolu luzaphawulwa emphakathini ngesikhathi sekudlalwa imncintiswano yamaYouth Games ngoNcwabakazi eMasvingo.
INational Sports Policy le izagxila kakhulu ekuqondiseni inhlanganiso zemidlalo ukutholeni imali yosekelo kanye lokusebenzisa imitshina yakulezinsuku.
ULanga ubesesolwa zinhlanganiso zemidlalo ngoba kuthiwa akukho akwenzayo okungaguqula isimo sezemidlalo.
“INational Sports Policy izakuba khona kunyanga ezilandelayo. Ngileqiniso lokuthi kusiyafika isikhathi sama-Youth Games eMasvingo, iNational Sports Policy izabe isikhona njalo isisebenza.
“Inhloso ngeyokulungisisa imidlalo yethu, sibelolwazi lokuthi iZimbabwe ilethalenta elinganani njalo abadlali bethu bakusimo esinjani,” kutsho uLanga kumcimbi womdlalo wekhilikithi oqhutshelwe enkundleni yeHeath Streak Academy ngeSonto.
Ukuswelakala kweNational Sports Policy kubikwa yikho okubuyisele muva ukuphumelela kwamathimu adlalela isizwe emncintiswaneni yaphezulu.
Ukungeneli kwemali evela kuHulumende esekela amathimu lenhlanganiso zemidlalo ngokunye okukhangelelwe ukuthi kulungiswe iNational Sports Policy le.
“Kunengi okumunyethwe luhlelo lolu. Udaba losekelo lwemali lokukhokhelwa kwenhlanganiso ngohlonzi ngokunye kwalokhu esizakukhangela.
“INational Sports Policy izanceda wonke umuntu, kusukela ezikolo, amakilabhu lamathimu amakhulu. Silethemba lokuthi kusiyaphela umnyaka lo, kuzakuba lotshintsho,” nguLanga lo.
Ngesikhathi ebika lokhu emphakathini, uLanga ubelalelwe ngumsekeli kaMongameli wesizwe uEmmerson Mnangagwa.
Online Reporter