adminNcekwenhle Ncube
ZINCWEBISANA igwayi izakhamuzi zeFilabusi ngendaba yendoda ebanjwe incinda uluju lwemvelo lomfazi wesinye isakhamuzi yahlawuliswa inkomo, uMthunywa ongelampontshi uyakuveza lokhu lamhlanje.
Indabamlonyeni le yenzakale ngeviki ephelileyo lapho uMnunzana Vumani Moyo ahlaliswe phansi esetheswa icala lokuya emacansini loNkosazana Pretty Ndlovu unkosikazi kaMnunzana Hlonipha Dube.
Iphephandaba likazulu lizwe ukuthi kumaviki amabili adluleyo uMnu Moyo watholwa nguMnu Dube emzini wakhe ezincindela uluju lwemvelo lonkosikazi wakhe wacela ezinyaweni kodwa watshiya izicathulo eziyizo ezisetshenziswe njengobufakazi.
“Ngasuka ngisiya emsebenzini ngathi sengifikile inhliziyo yami yathi ngibuyele ngekhaya. Ngifika ekhaya ngathola uMnu Moyo esendlini yami lonkosikazi wami wabaleka watshiya izicathulo zakhe eziyizo eziyibufakazi bokutshengisa ukuthi ngempela ngambamba.
“Lindaba ngiyibikele abadala bona abahlale phansi baxoxisana labobabakazi bakaMnu Moyo bavumelana ukuthi uzahlawula inkomo kumbe imali engamadola angamakhulu amahlanu ngoba edelele emzini,” kuchaza uMnu Dube.
UMnu Moyo uvumile ukuthi icala elinjalo walenza njalo uzahlawula imali ebiziweyo noma nje ingathi iyamsinda njengoba umkhonomi ungamanga kuhle.
“Lelicala ngalenza njalo ngahlawuliswa inkomo kodwa bathe bafuna imali. Okwakhathesi sengizuze imali engamakhulu amabili kodwa bathi bayifuna ihlangene,” kutsho uMoyo.
Uqhubekele phambili echaza ukuthi izicathulo zakhe zathathwa ngesikhathi ebanjwa kodwa uyazifuna njengoba abadala sebehlale phansi bakhumisana umlotha.
Ekhulumisana loMthunywa uNkszn Ndlovu uvumile ukuthi lokhu kwenzakala kanti njalo uthe uthando lwabo luqale ukuvutha ngesikhathi emsebenzela.
“Kuliqiniso ukuthi sabanjwa loMnu Moyo. Ubaba wayengekho eye emsebenzini uMnu Moyo wafona ukuthi ethi uyeza. Kwathi esebuyile ebusuku ngehola letshumi ubaba wafika, yiso isikhathi uMnu Moyo abaleka watshiya izicathulo.”
“Ngaqala ukuthandana laye ngisamsebenzela e-car wash yakhe khonapha eFilabusi. Ngiyazisola ngalokhu okwenzakeleyo ngoba sekuzangichithela umuzi wami omuhle,” kuchaza uNkszn Ndlovu.
Online Reporter