UBenjani Futhi?

INHLANGANISO yeZimbabwe Football Association kubikwa ikhangelele ukuqhatsha kakutsha uBenjani Mwaruwari njengomsekeli kamqeqetshi wamaWarriors.

UMwaruwari ubengomunye wabaqeqetshi abathathu ababengaphansi kukaZdravko Logarusic. Wancedisa imidlalo emibili kuphela andubana iZIFA ixotshe abaqeqetshi ngoMpandula, ngenxa yokungenzi kuhle umsebenzi.

Umgadli owake wadlalela iManchester City lo kasakhethwanga kuqula labaqeqetshi ngesikhathi uNorman Mapeza ethatha intambo zokulolonga iqembu lesizwe.

Kuliviki, abasikibebunda labafakazi abaqotho emawofisini eZifa baveze ukuba sekuseduzane ukuthi uMwaruwari abizwe ukuzoncedisa uMapeza.

Ama-Warriors akhangelelwe ukuthi angene enkambeni yokulolonga ngemva kwekhefu lekhisimusi, kulindelwe ukuthi ayencintisa kumqhudelwano we-Africa Cup of Nations (Afcon) eCameroon ngoZibandlela.

UMthunywa uzame ukuxhumana lesikhulumi seZifa uXolisani Gwesela kodwa kwehlula ukuthi adobhe ucingo ngoLwesithathu.

Umfakazi osondelane leZifa uthe: “Indaba yomqeqetshi ayikaphethwa. Kunjalo, iZifa ixoxisana loMwaruwari. Kulethemba lokuthi ekupheleni kwaleliviki kuvunyelwane kufanele sazi ukuthi izinto zibheke ngakuphi.

“Injongo yikuthi uMapeza athole ingcitshi ezamncedisa eselungiselela imidlalo yeAfcon.

NgoNtulikazi uMwaruwari waphindela kuqembu le-Portsmouth eNgilandi lapho afundela ukuba ngumqeqetshi, elungiselela ukuthola isithupha se-Uefa A.

Wafundela njalo iSports Management.

UMwaruwari wakubeka egcekeni ukuba inguqu yakuleli idinga ukuthi ikhokhelwe ngabasakhulayo njalo kumele kufane lakuqula labaqeqetshi.