admin
Thokozile Mbedzi
KULENDODA yelokitshoni leNjube koBulawayo ebotshwe ngamapholisa isetheswa icala lokudlwengula inina elileminyaka yokuzalwa engu-21 eliyisimungulu futhi elingezwayo lendlebeni.
Umetheswacala uHappias Ncube oleminyaka engu-31 kubikwa uhlukuluze inina leli mhlaka 5 kuyonale inyanga.
Ekhuluma lentatheli kaMthunywa uNkosazana Senzeni Dube uthe uNcube wathi evela emsebenzini waqambela umkakhe amanga wathi isisu sibuhlungu kanti liqhinga lokuyaganga unkosikazi wakhe elibele.
“UNcube wavuka emadabukakusa wathi ugijinyiswa yisisu waphuma isikhathi eside unkosikazi wakhe waze wacina evuka emlandela ngoba esecabanga ukuthi kungenzeka ukuthi kaselamandla.
“Kanti kabuzanga elangeni uzahlangana lenkemenkeme yendaba edida ingqondo. Wathi evula isivalo sekamelweni labo lokulala umnyango waso ongena endlini yokuziphumulela lwamtshaya lwameqa uvalo ebona umkakhe ehlukuluza inina leli elililoja emacansini.
“Khonokho nje wahle wabiza umalume wenina leli obelele kwelinye ikamelo ukuba azobona umhlolo lo,” kutsho uNkszn Dube.
Ungezelele wathi amalunga ezimuli lezi ahlala phansi akhulumisana avumelana ukuthi indaba le ingabikwa emapholiseni.
“Ngosuku olulandelayo inina lelo lazihambela lodwa emapholiseni layamangala selinanzelele ukuthi abadala kungathi bayathandabuza ukuya emapholiseni. Lokhu kusidanisile kakhulu ngoba lezinsuku kukhulunywa ngodlame kodwa bona bayakufukamela,” kulandisa uNkosazana Dube.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile ehofisini yabo.
“Amapholisa achwayisisa udaba lapho elinye inina eliyisimungulu njalo elingezwayo lendlebeni elihlukuluzwe ngenye indoda elihlala layo.
“Amapholisa ahle abopha leyondoda. Sikhuthaza uzulu ukuthi aphangise ukumangala amacala afanana lala ukuze abantu labo baphangise ukuyathola usizo kwabezempilakahle,” kuphetha ulnsp Ncube.
Online Reporter