adminCornelius Luphahla
ZIBAMBE oluphuphumayo izakhamizi zesigabeni seNtalale eGwanda ngesikhathi amapholisa esigaba ebhaxabula enye indoda aze ayitshiya isibangwa lezibi okubangele ukuthi ize iyevukela esibhedlela bethi itshontshe imali yomunye usomabhizimusi.
Isisanasana lesi senzakale ngoLwesihlanu kuviki ephelileyo lapho uMthabisi Sibanda abhuqwe khona ngamapholisa esigaba bethi utshontshe imali kaMnumzana Talent Ncube engange$800 encedisana loSifiso Ncube.
UMthunywa uxhumane loMnumzana Lucky Mabhena oyisakhamuzi sakule indawo wathi imali le yatshontshwa nguSifiso wathi eyinye uyigcinise uMthabisi eqamba amanga.
“Imali le yatshontshwa nguSifiso endlini kaNcube kwathi ngesikhathi amapholisa esigaba embuza wathi eyinye imali uyigcinise uMthabisi etsho eqamba amanga. Kuthe kunjalo amapholisa la ambopha asuka lapho abopha loMthabisi.
“Okungimangalisayo yikuthi atshaya uMthabisi yedwa atshiya uSifiso okunguye owatshontsha imali le. Athe sebona ukuthi kasenelisi lutho amekela uSifiso wasevuma ukuthi uqamba amanga imali yatshontshwa nguye bahle bamusa esibhedlela esiseduze abafika bamdlulisela esibhedlela seUnited Bulawayo Hospitals ngoba wayelimele kakhulu,” kulandisa uMnu Mabhena.
Ebuzwa ngale indaba umetheswacala uSifiso Ncube walile ukuthi watshontsha i$800.
“Mina imali engayithathayo yi$250 kuphela kangizange ngithathe i$800 leyo uNcube asekhuluma ngayo. Lapha sengiqambela amanga esenzela ukuthi ngimbhadale.
Ebuzwa ukuthi wayetshontshelani uthe: “Angazi ukuthi ngangingenwe yini ngize ngithi eyinye imali ithethwe nguMthabisi. Khathesi sengizisola ukuthi ngangikukhulumelani ngoba amapholisa amtshaya amlimaza. Ngakho-ke imali kaNcube ngizazama ukuyidinga noma nje engayithathayo sengayibisela,” kutsho umetheswacala uSifiso.
UMnumzana Liberty Ncube oyisihlobo sikaMthabisi Ncube ubikele intatheli ukuthi uzwa ubuhlungu kakhulu ngomntanomnewabo otshayelwe into ongayaziyo.
“Mina ngibuhlungu ngomntanomnewethu otshayelwe into angayaziyo. Ngikhuluma nje khathesi usesibhedlela ulimele njalo sesidlalise imali zethu ezinengi sizama ukumelaphisa,” kutsho uMnu Ncube.
Ebuzwa ngale indaba uMnumzana Talent Ncube uthe yena wayegcine imali ye EcoCash endlini yakhe wathola ingasekho ngemva kokuzwa kuthiwa kungene uSifiso njalo kazange wangezelela imali eyacatshayo.
“Mina ngangitshiye imali engange $800 endlini yami eye EcoCash ngathola ingasekho ngemva kokuzwa kuthiwa uSifiso nguye ongene endlini yami. Ngabikela amapholisa ambopha wasesithi eyinye uyigcinise uMthabisi.
“Ukuthi ngacatshelwa yi$250 kuphela ngamanga, uSifiso wenzela ukuthi asale leyinye imali yami ayitshontshayo mina ngiyifuna yonke,” kuphetha uMnu Ncube.
Online Reporter