Online Reporter
OWESIFAZANE owafulathela umuzi wakhe waya eSouth Africa eminyakeni eyisificaminwembili eyedluleyo ngemva kokusola umkakhe ngokungathembeki, uphendukile ekhangelele ukubuyela emzini wakhe, kodwa wamangala lapho ethola ukuthi umkakhe usedlulele phambili njalo usethethe omunye umfazi.
Ingxabano yemuli le, ivele phambi komthethwandaba wesintu wenduna uMutasa ngoMgqibelo odluleyo, lapho uMarcia Majarira agcizelele ukuthi uFarai Chiteshi usesengumyeni wakhe osemthethweni lanxa bebehlukene okweminyaka eminengi.
UMajarira uthe wasuka emzini wakhe ngenxa yokungathembeki kukaChiteshi, esithi wayethandana labanye abesifazane.
“Wayethandana labanye abesifazane njalo wayebethula kimi. Ngesinye isikhathi wayethandana lababili. Wathatha izigqoko zakhe lengubo zokulala wayahlala komunye wabo,” utsho njalo.
UMajarira uthe izinto zaba zimbi kakhulu lapho uChiteshi esethatha omunye wezithandwa zakhe wamletha ukuthi azohlala emzini wabo.
“Ekucineni wangixotsha ngoba wayefuna ukuthi omunye walabo athandana labo ahlale emzini wethu. Wayesehluleka ukubhadalela zonke izintombi zakhe indawo zokuhlala, yikho waletha omunye wazo endlini yami,” kutsho yena.
Ngemva kokungahambi kuhle kobudlelwano babo, uMajarira uthe waqala wabuyela ekhaya kubazali bakhe, wasesuka waya eSouth Africa lapho ahlala khona okweminyaka eminengi.
Usola uChiteshi ngokuvumela omunye umfazi ukuthi asebenzise impahla yakhe yasendlini ngesikhathi yena engekho, okwenza ezinye zazo zonakale.
“Wayesebenzisa impahla yami lomunye umfazi. Enye impahla yami yayitshiywe phandle yaze yonakaliswa lizulu. Lokho kwangizwisa ubuhlungu ngoba ngasebenza nzima ukuze ngithenge lezo mpahla,” kutsho yena.
Udaba lolu lwaba buhlungu kakhulu lapho uMajarira ekhuluma ngesimo sabantwana babo, esola uChiteshi ngokwehluleka ukubanakekela lokubanika uncedo olwaneleyo.
“Ngifuna njalo ukwazi ukuthi kuzakuba njani ngabantwabethu ngoba akabanakekeli njalo akabasizi. Kuyo yonke liminyaka wayelokhu engitshela ukuthi uzakuza asithathe, kodwa kazange afike,” kutsho yena engasenelisi ukuzibamba izinyembezi.
Lanxa sebehlukene okweminyaka, uMajarira uthe usamthanda uChiteshi.
“Ngisamthanda umyeni wami. Ngisabizwa ngebizo lakhe njalo kimi umtshado wethu kawuzange uphele,” utsho njalo.
Uthe umtshado wabo kawuzange uqedwe ngokusemthethweni, yikho wabuza ngokuba semthethweni kobudlelwano bukaChiteshi lomunye umfazi.
“Lisengumtshado osemthethweni, njalo uhlobo lomtshado esawenza kalumvumeli ukuthi atshade lomunye umfazi esatshade lami. Kodwa khathesi usehlala lomunye umfazi,” utsho kanje.
Kodwa uChiteshi uveze olunye uhlangothi lwendaba okwabangela ukuthi behlukane.
Uvume ukuthi wayeke wathandana labanye abesifazane engatshadanga labo, kodwa waphika ukuthi waxotsha uMajarira emzini wabo.
“Kwathi esethole ukuthi ngangithandana labanye abesifazane, ngabhadala inhlawulo yokucela uxolo, kodwa yena waqhubeka wasuka waya ngakibo,” kutsho uChiteshi.
Uthe wakwazi ukuthi umkakhe usehambile kuphela lapho ebuya emsebenzini wafica umnewabo kaMajarira epakitsha impahla zakhe.
“Ngabuya emsebenzini ngafica umnewabo elayitsha impahla zakhe. Wangitshela ukuthi abazali bakhe yibo ababemthume, njalo bathi nxa ngifuna ukuthi abuye, kumele ngilandele bona ekhaya,” kutsho yena.
UChiteshi uthe wachitha iminyaka emibili ezama ukubuyisana lomkakhe kodwa ekucineni waphela amandla.
“Okweminyaka emibili ngangilokhu ngimdinga umkami. Ngekela kuphela ngemva kokuba uyise ethe kimi ngiyekele. Eminyakeni eyisithupha elandelayo kasizange sikhulume, yikho ngaqhubeka ngempilo yami,” kutsho yena.
UChiteshi uphinde waphika izinsolo zokuthi wayetshiye abantwana bakhe engabanakekeli, esithi wazama ukubancedisa ngemva kokuhamba kukaMajarira.
Lanxa evuma ukuthi yena loMajarira babelesikhathi eside bebonke, uChiteshi uthe kasafuni ukuvuselela umtshado wabo.
“Uselesikhathi eside kakhulu engasekho kimi. Angisamfuni ukuthi abe ngumkami,” kutsho yena.
Kusinqumo sayo induna uMutasa yeluleke uChiteshi ukuthi esule umtshado wakhe ngokusemthethweni esebenzisa inkundla, imxwayisa ngokuthi angabe esenza icala lokutshada kabili ngokuhlala lomunye umfazi ngesikhathi esesatshadile ngokusemthethweni.
Induna iphinde yalaya uMajarira ukuthi aye eMaintenance Court nxa efuna ukuthi uChiteshi ancedise ngokwezimali ekunakekeleni abantwababo.
