Online ReporterEthel Ncube
KULENINA lelokitshini leNketa koBulawayo elingasoze lafa lakhohlwa usuku lwangoMvulo, kulandela ukubanjwa inkunzi lihamba lesithandwa salo, sengathi akwanelanga labuye labotshelwa esihlahleni ladlwengulwa, duzane leMbuyazwe.
Kubikwa inina leli esingeke saveza igama lalo, elileminyaka engu-26 yokuzalwa belisuke ngemota lesithandwa salo esileminyaka engu-37 besithi bayatshaywa ngumoya duzane leMbuyazwe baze behlelwe ngamashwa la, ngoMvulo kuyonale iviki.
Ababili laba kubikwa bathi befika duzane leMbuyazwe bama eceleni komgwaqo, baphuma emoteni, bahlala phandle.
Khonokho, kwathutsha amadoda amabili athi badingani lapho yibo abatshontsha inkomo zabo. Omunye wabo waxabana lesithandwa sikamamangala okwemizuzu elitshumi waze wakhupha umbhobho wohlobo lwe-pistolwamtshaya ngesidindi, kukanti omunye wakhupha ingqamu wagwaza umamangala izihlalo.
Kubikwa omunye wezigelekeqe lezi wangena labo iganga wafika wababophela esihlahleni, omunye wabuyela emoteni wayatshontsha imali lomakhalekhukhwini. Kuthe lo owayesele ebalindile egangeni wasuka lomamangala wayambophela kwesinye isihlahla andubana amdlwengule kanye engazivikelanga.
Owayeye emoteni wabuye waphenduka wafika wanika isithandwa sikamamangala ikhadi lebhanga kunye lechence lakhe lokutshayela andubana batshaye utshani lemota.
Ababili laba benelisa ukuthi bazikhulule andubana bahambe amakhilomitha amathathu ngenyawo ukuze bathole imota yokugada eyabatshiya emapholiseni.
Kubikwa izigelekeqe lezi zatshontsha iUS$1 000, omakhalekhukhwini ababiza US$3 000 kunye lemota ebiza R400 000.
Omele isikhulumi samapholisa koBulawayo, u-Assistant Inspector, Nomalanga Msebele uthe amapholisa achwayisisa ngombiko lo. “Udaba olunjalo lusezandleni zethu, sicela ongabe elolwazi ngezigelekeqe lezi ezimbili azise amapholisa aseduzane laye.
“Sicela uzulu angamisi izimota endaweni ezisegangeni ngoba izigelekeqe yikho lapho ezihlasela khona,” kubika u-Asst Insp Msebele.
