Online Reporter
Brandon Moyo
U-Antum Naqvi uthe kuyamjabulisa ukuba ngukaputeni we-Rhinos ethole isicoco sayo sakuqala se-Domestic T20 ngemva kokunqoba i-Eagles ngama-runs angu-49 e-Harare Sports Club.
Umdlali lo, oleminyaka engu-25, ubengukapteni obalulekileyo ngokutshaya lokujika ibhola kumdlalo wokucina kumncintiswano lo obuphawula ngokusemthethweni ukuvalwa kwesizini yemidlalo ka-2024/25.
Kube yikunqoba obekuyifanele iRhinos nanko yaqeda isendaweni yesibili ngo-2010/11 lango-2022/23. Baphinde behlulwa kuPro50 Championship kulisizini.
“Ngijabulile ngokuba ngukaputeni we-Rhinos sithatha isicoco se-Zimbabwe Cricket Domestic T20. Ngibonga kakhulu kubadlali eqenjiji, abaqeqetshi, izisebenzi labasekeli bethu. Omunye lomunye wenu udlale indima ebalulekileyo kulimpumelelo. I-Rhinos ithethe inkezo,” uNaqvi lo eloba emakhasini akhe ebulenjini.
Umdlali lo utshengisele ubungcitshi bakhe ethola ama-runs angu-50 kumabhola angu- 32. Utshaye umngcele amahlandla amane, weqisa ibhola kabili.
Abanye abadlali abenze kuhle nguTashinga Musekiwa (33), Victor Chirwa (27) loNyasha Mayavo (22).
URichard Ngarava loTinotenda Maposa bathethe ama-wicket amabili munye ngamunye kuqembu le-Eagles.
UNaqvi uthethe ama-wickets amabili kuhlandla lesibili lomdlalo. UBradley Evans loHendrichs Macheke benze okufanayo.
Kuqembu le-Eagles uCraig Ervine uhambe phambili nge-21 runs kumabhola angu-19.
Kusenjalo, inhlanganiso yeZimbabwe Cricket (ZC) itshayele ihlombe umdlali wesifazane uKelis Ndhlovu lonompembe uLangton Rusere ngokuthola izicoco kumkhosi we-Annual National Sports Awards (ANSA), oqhutshelwe eHarare ngeSonto ntambama.
UNdhlovu, oleminyaka yokuzalwa engu-19, uthole isicoco seZimbabwe Junior Sportswoman of the Year leseJunior Sportsperson of the Year. URusere ubenguTechnical Official of the Year.
Yona inhlanganiso yeZimbabwe Cricket inikwe isicoco seNational Sport Association of the Year.
