admin
Thokozile Mbedzi
BASATHUTHUMELE njalo batshaqekile abantu besigabeni sikaVillage 2 eBhudha eLower Gweru kulandela ukuzwa ngenye indoda eleminyaka engu-31 ebulele umkayo qede yatshiya ilalise usane lwabo eceleni kukanina andubana iyozibophela.
Kubikwa uMkhokheli Sibanda ubulele umkakhe, uZanele Sibanda oleminyaka engu-17 ngeSonto kuviki edluleyo andubana itshiye usane lwabo oluleminyaka emibili eceleni kukanina.
Intatheli kaMthunywa ixhumane loTobias Nkomo yena othe lokhu betshwaqe umzimba ngesehlakalo lesi.
“Kwenzakale indaba ehlasimulisa umzimba lapha esigabeni sethu.
UMkhokheli ubeselesikhathi eside ehlukene lonkosikazi wakhe kubangwa ukungathembeki emtshadweni.
Kuthe ngeSonto uZanele esiyavakatshela unina ngehola lesihlanu ntambama ohlala bucwadlana lomuzi kaMkhokheli wasembiza.
“UZanele wahamba ethi mhlawumbe umkakhe usefuna balungise izinto kanti hayi usebizwa yikufa ngoba umkakhe waqala ukumtshaya wambopha ngentambo yamathenesi entanyeni waze wafa qede walalisa umntwana eceleni kukanina.
“Uthe eqeda lapho laye wayazibophela endaweni okungaba ngaba yi-2km,” kulandisa uMnu Nkomo.
Isikhulumi samapholisa esabelweni seMidlands uEmmanuel Mahoko ebuzwa ngodaba lolu uthe solufikile ehofisini yabo.
Online Reporter