Online Reporter
KUBIKWA ukuthi udinwe yikulanyulwa owesilisa (25), osolwa ngokubulala uyise ngesagila ngemva kokuba engenele, walamula ingxabano ebiphakathi kwakhe lodadewabo abahlala laye ngakibo.
Ngokuthola kwentatheli, uMnumzana John Mathabela (67), weJikaza, eLundi, eSouth Africa utshaywe wabulawa yindodana yakhe (eligodliwe igama layo njengoba ingakaveli enkantolo), ngoba ingahambisani lesenzo sakhe sokulamula ingxabano ebiphakathi kwayo lendodakazi yakhe.
Kuthiwa umsolwa ungene endlini, waphuma lesagila, watshaya ngaso uyise ocine etshonele endleleni yokuya esibhedlela.
Intatheli ikhulume loMnu Muzi Mathabela, olilunga lomdeni, othe basatshaqekile ngesenzo esenziwe yindodana yabo kuyise oyizalayo.
Uchaze umsolwa njengomuntu obuye abe lokuphazamiseka ngokomqondo, athi lokhu ubona kulomthelela ekutheni abe lodlame, ngoba ukujwayele ukuphakamisela abazali bakhe isandla.
“Kwenzeka lokhu nje, laba bebevele bengahlalisene kuhle, bese beke babophisana lasemthethwandaba ngenxa yokungaziphathi kahle kwendodana. Kuthiwa indodana ibihlala imthuka uyise, okwadala ukuba ayifakele isivimbelo senkantolo, kodwa wacina ngokulesula icala.
“Njengamanje, ungaphansi kwesandla samapholisa. Kwenzeka lokhu nje, bezivele zikhona izimpawu ezikhombisa ukuthi ukuziphatha kwakhe kungacina kudale umonakalo, njengoba sekwenzekile,” utsho njalo.
Okhulumela amapholisa eKwaZulu-Natal, uColonel Robert Netshiunda, usiqinisekisile isehlakalo.
“Amapholisa eMahlabathini abophe umsolwa obulale uyise, ngemva kokuba kade emkhuza, etshaya udadewabo. Ubaba utshayeke endaweni ebucayi, wadluliselwa esibhedlela, waphelela endleleni,” utsho njalo. -Ilanga
